३१ (पान ५ साठी)

शासनाच्या उपविधी समितीवर
डॉ. सोपान शिंदे

सकाळ वृत्तसेवा
रत्नागिरी, ता. १० : राज्यातील नागरी व ग्रामीण बिगरशेती सहकारी पतसंस्थांना सुधारित आदर्श उपविधी लागू करण्यासाठी राज्य शासनाने आदर्श उपविधी सन २०१३ मध्ये दुरुस्ती करण्यासाठी समिती गठित केली आहे. या समितीमध्ये रत्नागिरी जिल्ह्याचे उपनिबंधक (सहकारी संस्था) डॉ. सोपान शिंदे यांची निवड करण्यात आली आहे. या समितीमध्ये जिल्हा उपनिबंधक प्रवर्गातून राज्यातून एकमेव डॉ. सोपान शिंदे यांची निवड झाल्याने त्यांचे सर्व स्तरातून अभिनंदन केले आहे.
९७व्या घटना दुरुस्तीनंतर राज्यांमध्ये नागरी व ग्रामीण बिगरशेती सहकारी पतसंस्था व पगारदार सहकारी पतसंस्थांना आदर्श उपविधी सन २०१३ लागू करण्यात आली. राज्यातील सर्व पतसंस्थांनी आदर्श उपविधी स्वीकारले आहेत; परंतु यानंतर राज्य शासनाने सहकार कायद्यामध्ये स्वतंत्र प्रकरण समाविष्ट केले आहे. सर्वोच्च न्यायालयाने ९७वी घटनादुरुस्ती रद्द करण्याचा गुजरात उच्च न्यायालयाचा निर्णय कायम केल्याने महाराष्ट्र सहकारी संस्था अधिनियम १९६० मध्ये २८ मार्च २०२२ ला शासनाने अधिसूचनेद्वारे दुरुस्ती केली आहे.
बदललेल्या तरतुदीच्या अनुषंगाने नागरी व ग्रामीण बिगरशेती सहकारी पतसंस्था आणि पगारदार सहकारी पतसंस्थांच्या आदर्श उपविधी सन २०१३ मध्ये सुधारणा करणे आवश्यक होते. यासाठी राज्य शासनाने स्वतंत्र समिती गठित केली असून, अप्पर निबंध पतसंस्था सहकारी संस्था (महाराष्ट्र, पुणे) हे या समितीचे अध्यक्ष आहेत. या समितीमध्ये आठ सदस्यांचा समावेश आहे. या समितीला आवश्यक त्या तरतुदींबाबतचा अहवाल दोन महिन्याच्या कालावधीत शासनास सादर करायचा आहे.