हळवल फाट्यावरील वळणावर टेम्पो पलटी
कणकवली,ता. ३ः गोव्याहून मुंबईच्या दिशेने जाणाऱ्या आयशर टेम्पो हळवल फाट्यावरील अवघड वळणावर पलटी झाला. या अपघातात सुदैवाने कोणतीही दुखापत झाली नाही. मात्र, टेम्पोचे मोठे नुकसान झाले. काल (ता. २) रात्री ११ वाजण्याच्या सुमारास ही घटना घडली.
अपघाताची माहिती मिळताच कणकवली पोलिसांसह वाहतूक पोलिसांनी अपघातस्थळी धाव घेतली. कणकवली पोलिसांनी दिलेल्या माहितीनुसार, हळवल फाटा येथे टेम्पो आला असता चालकाचे नियंत्रण सुटल्याने टेम्पो पलटी झाला. टेम्पो मधील ऑइल रस्त्यावर पडल्याने दुसरी गाडी घसरून अपघात होऊ नये यासाठी पोलिसांकडून जेसीबीद्वारे त्या ऑइलवर माती टाकण्यात आली होती. तसेच जेसीबीच्या सहाय्याने रस्त्याच्या मधोमध पलटी झालेला टेम्पो बाजूला करण्यात आला. पोलिसात घटनेची नोंद करण्याची प्रक्रिया रात्री उशिरापर्यंत सुरू होती.