दुकानाचे सर्व व्यवहार
असणारी बॅग चोरीस
राजापूर : दोन दिवसांपूर्वी शहरातील एका दुकानाच्या सर्व व्यवहारांची बॅग चोरट्याने चोरून नेली. हा प्रकार किराणा मालाच्या दुकानात घडला. या चोरीत एकूण ४५ हजारांच्या रोख रकमेसह महत्त्वाची कागदपत्रे चोरीला गेली आहेत. राजापूर पोलिसात संशयित चोरट्याविरुद्ध गुन्हा दाखल केला आहे. ही घटना २९ फेब्रुवारी सकाळी साडेनऊ ते दुपारी तीनच्या सुमारास घडली. पोलिसांकडून मिळालेल्या माहितीनुसार मरियम दाऊद डोसानी (रा. डोसानी प्लाझा) यांचे शहरात मालकीचे असलम ब्रदर्स हे किराणा मालाचे दुकान आहे. त्यांनी दुकानाच्या सर्व व्यवहारांची रक्कम असलेली बॅग काउंटरजवळ ठेवली होती. चोरट्याने ती चोरून नेली. या बॅगमध्ये ४५ हजारांची रोख रक्कम आणि बँक पासबुक, आधार कार्ड, पॅन कार्ड अशी कागदपत्रे होती. याप्रकरणी डोसानी यांनी राजापूर पोलिस तक्रार दिली. तक्रारीवरुन पोलिसांनी संशयित चोरट्याविरुद्ध गुन्हा दाखल केला आहे.