70397
पांडुरंग हडकर

भरधाव मोटारीच्या धडकेत
परुळेतील युवक जागीच ठार

सकाळ वृत्तसेवा
म्हापण,ता.१० ः ओव्हरटेक करणाऱ्या भरधाव मोटारीच्या धडकेत परुळे आजारवाडी येथील युवक जागीच ठार झाला. पांडुरंग ऊर्फ दाजी हडकर, असे मृताचे नाव आहे. ही घटना शनिवारी सायंकाळी घडली. घटनास्थळाहून पळ काढणाऱ्या चालकाला स्थानिकांनी पाट येथे रोखले. घटनेची नोंद येथील पोलिस ठाण्यात झाली आहे.
पोलिसांकडून मिळालेल्या माहितीनुसार, परुळे आजारवाडी येथील रहिवासी पांडुरंग ऊर्फ दाजी हडकर हे सागरी महामार्गवर रस्त्याकडेला उभे होते. त्याचवेळी कुडाळच्या दिशेने जाणाऱ्या मोटारीने ओव्हरटेक करण्याच्या नादात हडकर याला जोराची धडक दिली. त्यामुळे ते जागीच गतप्राण झाले. ही घटना काल सायंकाळी साडेसातच्या सुमारास घडली. मोटार चालक तेथे न थांबता निघून जात असताना ग्रामस्थांनी पाठलाग करून त्यांना पाट येथे अडवले. त्यानंतर ग्रामस्थांनी आक्रमक भूमिका घेत जोपर्यंत मोटार चालकास अटक होत नाही तोपर्यंत मृतदेह ताब्यात न घेण्याचा निर्णय घेतला. त्यानंतर चालकास पोलिसांनी अटक केल्यानंतर मृतदेह ताब्यात घेतला. सागरी महामार्गावरील वाहतूक मोठ्या प्रमाणात वाढली आहे. त्यात वाहन चालक अतिशय वेगाने वाहन चालवताना दिसून येतात. मुळात या मार्गाच्या आसपास वस्ती असल्याने वाहन चालकांनी वेगावर नियंत्रण ठेवणे गरजेचे आहे. पांडुरंग यांच्या अपघाती मृत्यूमुळे त्यांच्या कुटुंबावर दुःखाचा डोंगर कोसळला आहे. त्यांच्या मागे वडिल, भाऊ, विवाहित बहिणी असा परिवार आहे. पांडुरंग यांना शेतीची आवड होती. कष्ट करून भुईमूग लागवड केली आहे. वडिल आजारी असतात. एक भाऊ मुंबई येथे नोकरी करतो. पांडुरंग यांना अभिनयाची आवड होती. त्यामुळे ते एकांकिका स्पर्धा, नाटकामध्ये सहभाग घेत असत.