२९ (टुडे ३ साठी)

''स्वीप'' अंतर्गत दापोलीत स्पर्धा

अण्णासाहेब बळवंतराव ; मतदान वाढवण्यासाठी प्रयत्न

सकाळ वृत्तसेवा
दाभोळ, ता. ४ ः लोकसभा निवडणुकीत मतदानाची टक्केवारी वाढावी यासाठी ''स्वीप'' अंतर्गत दापोली तालुक्यातील शाळकरी विद्यार्थ्यांसाठी विविध स्पर्धांचे आयोजन करण्यात आले आहे, अशी माहिती ''स्वीप''चे नोडल ऑफिसर तथा दापोलीचे गटशिक्षणाधिकारी अण्णासाहेब बळवंतराव यांनी दिली.
''स्वीप'' उपक्रमांतर्गत १ एप्रिलला सर्व शाळांमधून प्रभातफेरीचे आयोजन केले होते. मतदार जागृती करणारी घोषवाक्ये, पथनाट्य, गीतगायन आदी कार्यक्रमांचा समावेश फेरीत होता. या मतदारजागृती उपक्रमांतर्गत शालेय विद्यार्थ्यांसाठी चित्रकला स्पर्धेचे आयोजन केले. पहिली ते पाचवी व सहावी ते बारावी अशा दोन गटांत ही स्पर्धा होत आहे. ८ एप्रिलला पाचवी ते बारावीतील विद्यार्थ्यांसाठी निबंध स्पर्धेचे आयोजन केले असून, मतदानाचा हक्क, मतदानाचे महत्व, मतदान माझा अधिकार आणि लोकशाही आदी विषयांवर निबंधलेखन करायचे आहे. १२ एप्रिलला १ ली ते १२वीच्या विद्यार्थ्यांसाठी विद्यार्थ्यांच्या पालकांना पत्र तसेच १४ एप्रिलला मतदार जागृतीबाबत घोषवाक्य स्पर्धा केली आहे. या सर्व स्पर्धांमध्ये सर्व विद्यार्थ्यांनी सहभाग घ्यावा, असे आवाहन अण्णासाहेब बळवंतराव यांनी केले आहे. या स्पर्धांबरोबरच पंचायत समिती दापोली शिक्षण विभाग निर्मित मतदारजागृती अभियान कलापथकाची स्थापना करण्यात आली आहे. हे पथक दापोली तालुक्यात ठिकठिकाणी मतदार जागृतीपर समूहगीत गायन, पोवाडा, पथनाट्य आदींच्या माध्यमातून मतदार जागृती करणार आहे.
---------------