रामेश्‍वर-घरीवाडी येथे
२६ हजाराची दारू जप्त
सकाळ वृत्तसेवा
देवगड, ता. ४ः तालुक्यातील रामेश्‍वर घरीवाडी परिसरात सुमारे २६ हजार ५०० रुपये किंमतीची गोवा बनावटीची दारू पकडण्यात आली. विजयदुर्ग पोलिसांच्या पथकाने ही कारवाई केली. याप्रकरणी एका संशयिताविरुध्द कारवाईचा बडगा उगारण्यात आला. तालुक्यातील रामेश्‍वर घरीवाडी परिसरात अवैध गोवा बनावटीची दारू असल्याची माहिती पोलिसांना मिळाली.
त्यानुसार विजयदुर्ग पोलिस ठाण्याच्या पथकाने छापा टाकून सुमारे २६ हजार ५०० रुपयांची गोवा बनावटीची दारू पकडली. यामध्ये विविध प्रकारातील बाटल्यांचा समावेश होता. यामध्ये सुमारे १५०० रुपये किंमतीच्या १८० मिली मापाच्या १५ बाटल्या, सुमारे १००० रुपये किंमतीच्या १८० मिली मापाच्या पाच बाटल्या, सुमारे ४८०० रुपये किंमतीच्या ७५० मिली मापाच्या ६ बाटल्या तसेच सुमारे १९,२०० रुपये किंमतीच्या १८० मिली मापाच्या ९६ बाटल्या अशी एकूण २६ हजार ५०० रुपयांची दारू पकडण्यात आली. पथकामध्ये सहायक पोलिस निरीक्षक मनोज सोनवळकर, पोलिस हवालदार प्रशांत जाधव, पोलिस हवालदार गणेश भोवड, पोलिस शिपाई संभाजी कांडर आंदीचा समावेश होता. अधिक तपास विजयदुर्ग पोलिस करीत आहेत.