सोनुर्लीत सोमवारपासून
पुनःप्रतिष्ठापना सोहळा
सकाळ वृत्तसेवा
सावंतवाडी, ता. २५ : दक्षिण कोकणचे पंढरपूर म्हणून ओळखल्या जाणाऱ्या श्री देवी माऊलीचा पुनःप्रतिष्ठापना सोहळा २९ एप्रिल ते १ मे या तीन दिवसांच्या कालावधीत होणार आहे. यानिमित्ताने विविध धार्मिक कार्यक्रमांचे आयोजन करण्यात आले आहे, अशी माहिती प्रमुख मानकरी राजेंद्र गावकर आणि सुरेश गावकर यांनी दिली. याबाबत आज मंदिरात सोनुर्ली, मळगाव येथील ग्रामस्थांची बैठक घेण्यात आली. यावेळी देवाला कौल लावण्यात आला. यानंतर झालेल्या बैठकीत हा निर्णय घेण्यात आला. याबाबतची माहिती तेथील युवा कार्यकर्ते राज सोनुर्लेकर यांनी दिली. श्री देवी माऊलीचे मंदिर नव्याने बांधण्यात आले आहे. त्यानंतर या कार्यक्रमाचे आयोजन पहिल्यांदाच करण्यात आले आहे, असे मानकरी यांनी सांगितले.