बाजीराव पेशवे यांना
देवरुख येथे अभिवादन
साडवली, ता. २९ : युद्धात एकही लढाई न हरलेले आणि आपले साम्राज्य अबाधित राखलेले छत्रपती शिवाजी महाराज यांच्या नंतरचे शूर सेनानी प्रतापसूर्य बाजीराव पेशवे यांची पुण्यतिथी रविवारी देवरुख येथे साजरी करण्यात आली. देवरुख येथील रहिवासी मदन वामन मोडक यांनी बाजीराव पेशवा यांचा अश्वारूढ पुतळा तयार करून घेतला आहे. या पुतळ्याचे विधिवत पूजन करून पेशवे यांना अभिवादन करण्यात आले. देवरुख येथे मदन मोडक यांनी प्रतापसूर्य बाजीराव पेशवे उद्यान तयार करून नगरपंचायतीकडे वर्ग केले आहे. याच उद्यानात बाजीराव पेशवे यांचा अश्वारूढ पुतळा उभारण्यात येणार आहे. पुतळा पुणे येथील मूर्तिकार विवेक व विपुल खटावकर यांनी तयार केला आहे. रितसर परवानगी घेऊन हा पुतळा निवडणुका झाल्यानंतर बसवला जाणार आहे.