महाराष्ट्र स्थापना दिनानिमित्त
सिंधुदुर्गनगरीत आज ध्वजवंदन
सकाळ वृत्तसेवा
सिंधुदुर्गनगरी, ता. ३०ः महाराष्ट्र राज्याचा ६५ वा स्थापना दिन कार्यक्रम उद्या (ता. १) साजरा करण्यात येणार आहे. यानिमित्त ध्वजवंदनाचा मुख्य शासकीय कार्यक्रम सकाळी ८ वाजता पालकमंत्री रवींद्र चव्हाण यांच्या हस्ते सिंधुदुर्गनगरी येथील जिल्हा मुख्यालय, पोलिस परेड ग्राऊंड येथे होईल, अशी माहिती जिल्हाधिकारी किशोर तावडे यांनी दिली. ध्वजवंदनानंतर सकाळी ८.१५ वाजता पोलिस, राखीव व पोलिस दल यांचे संचलन होणार आहे. उद्या (ता. १) सकाळी ७.१५ ते ९ या वेळेत ध्वजवंदनाचा किंवा इतर कोणताही शासकीय अथवा निमशासकीय समारंभ आयोजित करण्यात येऊ नये. जर एखाद्या कार्यालयाला अथवा संस्थेला वैयक्तिक ध्वजवंदन करावयाचे असल्यास त्यांनी तो सकाळी ७.१५ वाजण्यापूर्वी किंवा ९ वाजल्यानंतर आयोजित करावा. समारंभाला राष्ट्रीय पोषाखात यावे. आचारसंहितेचे पालन करून नियमांचा भंग होणार नाही, याची दक्षता घ्यावी. महाराष्ट्र दिनाच्या कार्यक्रमास लोकप्रतिनिधी, स्वातंत्र्य सैनिक, शहिद जवानांच्या पत्नी व वीरमाता, वीरपिता, शौर्य पुरस्कार विजेते, राजकीय पक्षांचे पदाधिकारी, सर्व शासकीय अधिकारी, कर्मचारी, माध्यम प्रतिनिधी, इतर मान्यवर, विद्यार्थी आणि नागरिकांनी उपस्थित राहावे, असे आवाहन जिल्हा प्रशासनातर्फे करण्यात आले आहे.