.६ (पान ३ साठी)

भाजपची ‘कॉल’द्वारे मतदारांना साद

निवडणुकीसाठी हायटेक प्रचारावर भर

सकाळ वृत्तसेवा
चिपळूण, ता. ३ : पंतप्रधान नरेंद्र मोदी यांनी लोकसभा निवडणुकीत ‘चारसो पार’चा नारा दिला आहे. हे उद्दिष्ट पार करण्यासाठी भारतीय जनता पार्टीने हायटेक प्रचार यंत्रणेवर भर दिला आहे. आतापर्यंत वृत्तपत्र, वृत्तवाहिन्यांमधून पक्षाच्या जाहिराती, जाहीर सभा, प्रचारपत्रके, प्रचारफेऱ्‍यांमधून प्रचाराची राळ उठवण्यात आली आहे. त्यातच आता चक्क नागरिकांशी मोबाईलवरून कॉलद्वारे संपर्क साधत ‘कमळाचे बटण दाबा, भाजपाला विजयी करा’, अशी थेट सादच घातली आहे. मोबाईलवर आलेल्या या कॉलची चर्चा सर्वत्र रंगली आहे.
लोकसभा निवडणुकीमुळे राज्याचे राजकीय वातावरण ढवळून निघाले आहे. रत्नागिरी-सिंधुदुर्ग लोकसभा मतदार संघातही निवडणुकीची रणधुमाळी सुरू आहे. महाविकास आघाडीचे उमेदवार विनायक राऊत विरुद्ध महायुतीचे उमेदवार नारायण राणे अशी थेट लढत होत आहे. घरोघरी प्रचारावर भर दिला जात आहे.
भाजपने लोकसभा निवडणूक प्रतिष्ठेची बनवली आहे. पंतप्रधान नरेंद्र मोदी यांनी ‘चारसो पार’चा नारा देत विरोधकांना आव्हान दिले आहे. भाजपकडून विजयासाठी नवनवीन युक्त्या लढवल्या जात आहेत. आता तर चक्क नागरिकांच्या मोबाईलवर कॉल केला जात आहे. पुढील पाच वर्षे मोफत धान्य देण्याची मोदींनी केलेल्या घोषणेची माहिती देतानाच ‘कमळाचे बटण दाबा, भाजपाला विजयी करा’, अशी साद घातली जात आहे.