प्रत्येक विधानसभा संघनिहाय भरारी पथक
जिल्हाधिकारी एम. देवेंदर सिंह ; पदवीधर मतदारसंघ निवडणूक
रत्नागिरी, ता. १३ : जिल्ह्यात लोकसभेच्या धामधुमीनंतर आता पदवीधर मतदारसंघाची निवडणूक जाहीर झाली आहे. याबाबत जिल्हाधिकारी एम. देवेंदर सिंह यांनी बैठक घेतली. त्याअनुषंगाने प्रत्येक विधानसभा मतदारसंघात एक भरारी पथक कार्यरत ठेवण्याच्या सूचना जिल्हाधिकाऱ्यांनी दिल्या.
पदवीधर मतदारसंघाची निवडणूक १० जूनला होणार आहे. त्याअनुषंगाने जिल्हाधिकाऱ्यांनी बैठक घेऊन आढावा घेऊन अधिकारी, कर्मचाऱ्यांना काही सूचना दिल्या. सर्व सहायक निवडणूक अधिकाऱ्यांकडून आवश्यक अहवाल घेवून ते लवकरच पाठवावेत, एमसीएएमसी, एमसीसी समिती स्थापन करा, प्रत्येक विधानसभा मतदारसंघात एक भरारी पथक कार्यरत ठेवा, अशा सूचना देण्यात आल्या.
यावेळी अप्पर जिल्हाधिकारी शंकर बर्गे, निवासी उपजिल्हाधिकारी चंद्रकांत सूर्यवंशी, उपजिल्हा निवडणूक अधिकारी राहुल गायकवाड आदी उपस्थित होते. कोकण विभाग पदवीधर मतदारसंघाची निवडणूक १० जूनला होत असून आचारसंहिता ८ मे ते १८ जून या कालावधीत लागू असेल. आचारसंहितेचेही काटेकोर पालन करण्याचे आवाहन करण्यात आले.