.४९ (पान ३ साठी)

बीडमधील बालविवाहाचे बिंग फुटले

पोलिसांची तत्परता; पालकांवरही गुन्हा दाखल

सकाळ वृत्तसेवा
रत्नागिरी, ता. १४ ः बीड येथील एका अल्पवयीन मुलीशी लग्न करून तरुण रत्नागिरीत आला. पण त्या मुलीने झोपेच्या गोळ्या घेतल्याने तिला जिल्हा शासकीय रुग्णालयात दाखल केले होते.
पोलिसांच्या चौकशीत ती मुलगी अल्पवयीन असल्याचे पुढे आल्याने बालविवाहाचे बिंग फुटले. याप्रकरणी बीड पोलिस ठाण्यात गुन्हा वर्ग करण्यात आला. दरम्यान पालकांविरोधात तसेच ''पोक्सो'' कायद्यांतर्गत गुन्हा दाखल करण्यात आला आहे.
काही दिवसांपूर्वी अठरा वर्षे पूर्ण होऊन पाच दिवस झालेली विवाहित तरुणीने झोपेच्या गोळ्या घेतल्या. तिला अस्वस्थ वाटू लागल्याने रुग्णालयात दाखल करण्यात आले होते. ही बाब जिल्हा रुग्णालयातील पोलिस चौकीत कर्तव्य बजावत असलेल्या पोलिस कर्मचाऱ्यांच्या लक्षात आली. त्यांनी त्या मुलीची आणि तिच्या पतीची चौकशी केली. त्यावेळी तो तरुण २७ वर्षांचा आणि ती तरुणी पाच दिवसांपूर्वीच अठरा वर्ष पूर्ण झालेली असल्याचे पोलिसांच्या लक्षात आले. ते दोघे नात्यातीलच असून त्यांच्यातील प्रेमसंबंधामुळे त्यांच्या नातेवाईकांनी काही महिन्यांपूर्वी त्या दोघांचे बीड येथे लग्न लावून दिले होते. त्यानंतर नोकरीनिमित्त ते दोघे रत्नागिरीत आले होते. परंतु, या दोघांमध्ये काही कारणातून वाद झाल्याने त्या तरुणीने झोपेच्या गोळ्या घेतल्या होत्या. दरम्यान, बीड येथे अल्पवयीन मुलीशी लग्न करुन लपवलेला गुन्हा अखेर यामुळे पोलिसांच्या निदर्शनास आला. पोलिसांनी गुन्हा दाखल करून तो बीड येथील पोलिस ठाण्यात वर्ग केला.