पिंगुळी-मोरजकरवाडीत
दीड लाखांची दारू जप्त

सकाळ वृत्तसेवा
कुडाळ, ता. १४ ः पिंगुळी-मोरजकरवाडी (ता.कुडाळ) येथील तुषार रमेश मोरजकर (वय ३५) याच्या घरी छापा टाकून पोलिसांनी सुमारे १ लाख ४५ हजार ८०० रुपयांची दारू जप्त केली. ही कारवाई आज दुपारी ११ वाजता केली. अनोळखी व्यक्तीने दिलेल्या माहितीनुसार कुडाळ पोलिसांनी ही कारवाई केली.
कुडाळ पोलिस ठाण्यात आज सकाळी ११ च्या सुमारास अनोळखी व्यक्तीने फोन केला. पिंगुळी-मोरजकरवाडी येथील एक पत्ता देत या ठिकाणी बेकायदेशीररित्या दारू विक्री होत असल्याची माहिती पोलिसांना दिली. यानुसार पोलिसांनी त्या ठिकाणी जाऊन छापा टाकला. यावेळी गोवा बनावटीचा दारूचा साठा सापडला. यामध्ये विविध ब्रँडची १ लाख ४५ हजार ८०० रुपयांची दारू जप्त करण्यात आली. या कारवाईत सहायक पोलिस निरीक्षक भिमसेन गायकवाड, हेडकॉन्स्टेबल के. एम. परुळेकर, पोलिस समीर बांदेकर, हरेश पाटील यांनी सहभाग घेतला.