पा न५

अनधिकृत, धोकादायक होर्डिंग्ज काढून टाका
जिल्हाधिकाऱ्यांच्या सूचना ः सर्व पालिकांना स्ट्रक्चरल ऑडिटचे आदेश
रत्नागिरी, ता. १६ : घाटकोपर येथील दुर्घटनेच्या पार्श्वभूमीवर महाराष्ट्र शासनाच्या आदेशानुसार जिल्ह्यामध्ये अशाप्रकारे कुठलीही दुर्घटना किंवा जीवित वा वित्तहानी होऊ नये यासाठी जिल्ह्यातील अनधिकृत आणि धोकादायक होर्डिंग तीन दिवसाची नोटीस देऊन काढून टाका, अशा सूचना जिल्हाधिकारी एम. देवेंदर सिंह यांनी दिल्या.
जिल्ह्याच्या आढावा बैठकीत त्यांनी या सूचना दिल्या. या वेळी पोलिस अधीक्षक धनंजय कुलकर्णी, अप्पर जिल्हाधिकारी शंकर बर्गे, निवासी उपजिल्हाधिकारी चंद्रकांत सूर्यवंशी, सर्व मुख्याधिकारी, तहसीलदार आणि अधिकारी उपस्थित होते. सिंह यांनी बैठकीमध्ये जिल्ह्यामध्ये अशाप्रकारे कोणतीही दुर्घटना होऊ नये व जीवित वा वित्तहानी होऊ नये यासाठी सर्व प्रशासकीय यंत्रणाच्या विभागप्रमुखांना सूचना दिल्या. सर्व कार्यालयीन विभागप्रमुखांनी आपल्या कार्यक्षेत्रातील सर्व अनधिकृत होर्डिंग्ज तसेच धोकादायक स्थितीत असलेले होर्डिंग्ज यांचे तत्काळ सर्व्हेक्षण करून अनधिकृत व धोकादायक होर्डिंगबाबत तीन दिवसांची नोटीस देऊन काढून टाकण्याच्या सूचना दिल्या तसेच परवानगी दिलेले सर्व होर्डिंग्ज व बॅनर्स यांचे स्ट्रक्चरल ऑडिट १५ दिवसांमध्ये करण्याच्या सूचनाही दिल्या. सर्व पालिकांना हद्दीतील अनधिकृत होर्डिंग व बॅनर उभारले जाणार नाहीत याची काळजी मुख्याधिकाऱ्यांनी घ्यावी. जिल्ह्यातील सर्व पालिकांमध्ये होर्डिंग्ज व बॅनरच्या दरपत्रकामध्ये एकसमानता आणण्याच्या सूचनाही देण्यात आल्या.