84610
-----------
जगबुडी पुलावर अपघातात
कंटेनर चालक गंभीर जखमी
खेड, ता. १९ : मुंबई गोवा महामार्गावरील भरणे येथील नव्या जगबुडी पुलावर चालकाचे कंटेनरवरील नियंत्रण सुटल्याने कंटेनर दोन्ही पुलाच्या मध्यभागी असलेल्या दुभाजकावर आदळला. या अपघातामध्ये कंटेनरचालक नदीपात्रात कोसळून गंभीर जखमी झाला. हा अपघात शनिवारी रात्री १०.३० वा च्या सुमारास घडला.
जगबुडी पुलावरील वळण अपघाताना निमंत्रण देणारे ठरत असून या ठिकाणी अनेक अपघात होऊन अनेकांनी जीव गमावला आहे. शनिवारी रात्री चालकाला पुलावरील वळणाचा अंदाज न आल्याने कंटेनरवरील नियंत्रण सुटल्याने ट्रक थेट दुभाजकाला धडकला. या धडकेत चालक नदीपात्रात कोसळला. यामध्ये तो गंभीर जखमी झाला. या अपघाताची माहिती पोलिसांना मिळताच स्थानिक पोलिस, कशेडी वाहतूक शाखेचे कर्मचारी रेस्क्यू टीम मदत ग्रुपच्या स्वयंसेवकांनी घटनास्थळी धाव घेत मदतकार्य केले. नदीपात्रात कोसळलेल्या चालकाला बाहेर काढून प्रसाद गांधी यांनी खासगी रुग्णालयात दाखल केले. नव्या जगबुडी पुलावर दिवे आहेत. मात्र ते अद्याप कार्यान्वित न केल्याने अंधारातच पुलावरून वाहने हाकावी लागत असल्याने अपघातामध्ये वाढ झाली आहे.