84934

आंबोलीतील सैनिक स्कूलची
१०० टक्केची परंपरा कायम

सकाळ वृत्तसेवा
आंबोली, ता. २१ ः येथील सिंधुदुर्ग सैनिक स्कूल अॅण्ड ज्युनियर कॉलेज, आंबोलीच्या वि‌द्यार्थ्यांनी बारावीच्या (विज्ञान) परीक्षेत घवघवीत यश संपादन केले. शाळेने सलग १४ व्या वर्षी १०० टक्के निकालाची परंपरा कायम राखली असून, २२ विद्यार्थी विशेष श्रेणीत तर उर्वरित १६ विद्यार्थी प्रथम श्रेणीत उत्तीर्ण झाले.
शाळेतून कॅडेट अॅलेक्स सावंत याने ८६.०० टक्के गुण मिळवून प्रथम, कॅडेट अजय गावकर याने ८१.१७ टक्के गुण मिळवून द्वितीय तर कॅडेट सुयश कदम याने ८०.३३ टक्के गुण मिळवून तृतीय कमांक पटकावला. आतापर्यंत अनेक विद्यार्थ्यांनी एन.डी.ए. लेखी परीक्षेसह जे.ई.ई., सी.ई.टी. व एन.ई.ई.टी. परीक्षेत यश प्राप्त केले आहे. शाळेचे अनेक विद्यार्थी आर्मी, नेव्ही, मर्चंट नेव्ही, बहुराष्ट्रीय कंपनी आदी क्षेत्रांत अधिकारी म्हणून सेवा बजावत आहेत. शाळेत निवासी सैन्य प्रशिक्षण कवायत, युद्ध कौशल्य, आत्मसंरक्षण, विविध साहसी खेळ व स्पर्धात्मक परीक्षांचे मागर्दशन केले जाते. शाळेने १०० टक्के निकालाची परंपरा कायम राखल्याबाबत संस्थेचे अध्यक्ष व सचिव सुनील राऊळ तसेच संचालक श्री. जॉय डॉन्टस, श्री. शंकर गावडे, श्री शिवाजी परब व सर्व संचालक, कार्यालयीन सचिव श्री. दीपक राऊळ, सैनिक स्कूलचे प्राचार्य नितीन गावडे तसेच सर्व शिक्षक व शिक्षकेतर कर्मचाऱ्यांनी विद्यार्थ्यांचे अभिनंदन केले.