पान ५

खेडमधील आणखी
७ गावांना टँकरने पाणी
खेड : मागील आठवड्यात तालुक्यातील ८ गावे ३५ वाड्यांमध्ये टँकरने पाणीपुरवठा सुरू असतानाच आणखी ७ गावातील १५ वाड्यांची भर पडली आहे. तहानलेल्या गाव-वाड्यांची संख्या झपाट्याने वाढत असतानाही प्रशासनाकडे अवघे दोनच टँकर उपलब्ध आहेत. एक दिवसाआड ११९ फेऱ्यांद्वारे आतापर्यंत पाणी वितरित करण्यात आले आहे. अपुऱ्या टँकरमुळे प्रशासन मेटाकुटीस आले आहेत. एकीकडे शेतीच्या मशागतीची कामे सुरू असताना टंचाईग्रस्त गाव-वाड्यांची संख्या झपाट्याने वाढत असल्यामुळे ग्रामस्थ हतबल झाले आहेत. तालुक्यात खवटी-खालची वरची धनगरवाडी, अस्तान -चाटव- धनगरवाडी, कशेडी बोरटोक, बंगला, थापेवाडी, सवणस, मूळगाव देऊळवाडी, नाभिकवाडी, वरचीवाडी, खालचीवाडी, चिरणी- धनगरवाडी, खोपी-अवकिरेवाडी, कळंबणी बुद्रुक -दंडवाडी आदी ठिकाणी पाण्याची झळ बसली होती. टँकरसाठी प्रशासनाकडे अर्ज दाखल केल्यानंतर सवणस येथील ३ वाड्या व खोपी येथील २ वाड्या वगळता अन्य ठिकाणी टँकरने पाणीपुरवठा करण्यात येत आहे. प्रशासनाकडे ६ हजार लिटर क्षमतेचा एक व ५ हजार लिटर क्षमतेचा एक खासगी टँकर उपलब्ध आहे. सुकिवलीतील चोरद नदीपात्रातून तहानलेल्या गाव- वाड्यांना एकदिवसाआड पाणीपुरवठा केला जात असून टँकरने तब्बल ११९ फेऱ्या धावत आहेत.

खेडमध्ये आपत्ती व्यवस्थापन प्रात्यक्षिके
खेड : पावसाळा काही दिवसांवर आला असताना नैसर्गिक आपत्तीवर मात करण्यासाठी प्रशासन सज्ज झाले आहे. खेड येथील जगबुडी नदीकिनारी सोमवारी (ता. २०) आपत्ती व्यवस्थापनाची प्रात्यक्षिके घेण्यात आली. या वेळी पालिकेच्या आपत्ती व्यवस्थापन पथकातील कर्मचारी व विसर्जन कट्टा पथकातील सदस्य उपस्थित होते. अतिवृष्टीत जगबुडी नदीने धोक्याची पातळी ओलांडल्यानंतर पुराचे पाणी बाजारपेठेत शिरते. या पुराच्या पाण्यात नदीकाठचे रहिवासी अडकून पडतात. अशाप्रकारच्या नैसर्गिक आपत्तीवर मात करण्यासाठी नगरपालिकेचे प्रभारी मुख्याधिकारी चेतन विसपुते, प्रशासकीय अधिकारी नागेश बोंडले यांच्या मार्गदर्शनाखाली जगबुडी नदीपात्रात होडीच्या सहाय्याने प्रात्यक्षिके घेण्यात आली. पालिका आपत्ती व्यवस्थापन पथकातील कर्मचारी व विसर्जन कट्टा पथकातील सदस्यांना आपत्तीबाबतचे धडे देण्यात आले. जीवितहानीसह वित्तहानी टाळण्याच्या दृष्टीने कोणकोणत्या उपाययोजनांचा अवलंब करायचा, याबाबत मार्गदर्शन करण्यात आले.