85491

झाड पडल्याने कोकीसरेत
वीजपुरवठा खंडित
सकाळ वृत्तसेवा
वैभववाडी, ता. २३ः तालुक्यातील कोकीसरे माधवराव पवार विद्यालयाच्या नजीक असलेलं गुलमोहराचे झाड आज दुपारी ३.३० वाजण्याच्या सुमारास वीज वाहिन्यांवर पडले. वीज वाहिन्या तुटून वीजेचा खांबही वाकला. या परिसरातील वीजपुरवठा सायंकाळी उशिरापर्यंत खंडित होता.
तालुक्यात गेले काही दिवस मान्सूनपूर्व पाऊस कोसळत आहे.
सायंकाळच्या सत्रात विजांच्या गडगडाटासह नेहमी पाऊस बरसत आहे. आज पावसाने विश्रांती घेतली. मात्र, दुपारी झालेल्या वादळाने कोकीसरे माधवराव पवार विद्यालयाच्या समोर असलेले गुलमोहराच झाड वीज वाहिन्यांवर पडले. यामुळे वीज वाहिन्या तुटून रस्त्यावर पडल्या. या घटनेमुळे खांबलवाडीकडे जाणारी वाहतूक काही काळ ठप्प झाली होती. या दुर्घटनेत वीज खांबही पुर्णतः वाकला गेला. या घटनेनंतर या परिसरातील विद्युत पुरवठा खंडीत झाला होता. या घटनेची माहिती मिळताच स्थानिक ग्रामस्थ व वीज वितरणाचे कर्मचारी यांनी रस्त्यावरील झाड बाजूला केले. सायंकाळी उशिरापर्यंत वीजपुरवठा सुरळीत झाला नव्हता.