87272

सुद्रिक निवृत्त होत असल्याची खंत

डॉ. सुनील लाड ः वनविभागात कामाचा वेगळा ठसा

‌कणकवली,ता. २ ः कृष्णा सुद्रिक यांनी आपल्या अनुभवातून आणि कौशल्याने वनविभागात काम करताना आपल्या कामाचा एक वेगळा ठसा उमटविला. ते वनविभागाचा कणा आणि खंबीर पाया होते. ते निवृत्त होत असल्याची खंत जाणवत आहे, असे प्रतिपादन सावंतवाडीतील सहाय्यक वनसंरक्षक डॉ. सुनील लाड यांनी केले.
कणकवली तालुक्यातील दिगवळे वनपरीमंडळ येथील वनविभागाच्या कार्यालयात वनमजूर सुद्रीक यांच्या सेवानिवृत्ती कार्यक्रमात श्री. लाड बोलत होते. यावेळी कणकवलीचे प्रभारी वनक्षेत्रपाल संदीप कुंभार, कडावलचे वनक्षेत्रपाल अमित कटके, रुक्मिनी कृष्णा सुद्रीक, व्ही.व्ही.मयेकर, शिवडावचे सरपंच नितिश भिसे, वनपाल सर्जेराव पाटील, वनपाल सारीक फकीर, शशिकांत साटम, वनरक्षक सिद्धार्थ, प्रतिराज शिंदे, अंजली सुतार, सुखदेव गळवे, नारायण शिर्के, संजय राणे, रुपेश गावडे, वृषाली सुद्रीक, गौरव सुद्रीक, सागर सुद्रीक, बालाजी तळेकर आदी उपस्थित होते.
डॉ. लाड म्हणाले, ‘‘सिंधुदुर्ग जिल्ह्यातील अनेक तालुक्यांत सुद्रीक यांनी सचोटीने आणि प्रामाणिकपणे सेवा बजावली आहे. आपल्या ३२ वर्षांच्या सेवा कालावधीमध्ये प्रामाणिकपणे जंगल फिरती आणि जंगल संरक्षणाचे काम केले. नर्सरीमध्ये आपल्या प्रदीर्घ अनुभवातून आणि कौशल्यातून रोपवन केले आहे.’’ संदीप कुंभार म्हणाले, ‘‘वनक्षेत्रातील वनमजूर आमची संपत्ती आहे. सुद्रीक यांनी सचोटीने आणि प्रामाणिकपणे सेवा केली. त्यामुळे निवृत्तीनंतर आम्हाला खंत वाटते. फिल्डवर काम करणारे वनमजूर म्हणून त्यांची उणीव भासेल. ते निवृत्त झाले तरी जेव्हा तुम्हाला त्यांच्या अनुभवाची आणि मदतीची गरज लागेल तेव्हा त्यांना बोलावून त्यांच्या अनुभवाचा आणि मार्गदर्शनाचा लाभ वनरक्षकांनी घ्यावा.’’ यावेळी डॉ. लाड यांच्या हस्ते निवृत्त वनमजूर श्री सुद्रिक यांचा सपत्नीक सत्कार करण्यात आला.