नव्या अभ्यासक्रम मसुद्यावर
प्रतिक्रियेसाठी मुदतवाढ द्या

सत्यशोधक शिक्षक सभेची मागणी

सकाळ वृत्तसेवा
कणकवली,ता. २ ः राज्य शासनाने तिसरी ते बारावी पर्यंतच्या पाठ्यपुस्तकाचा आराखडा तयार केला असून या आराखड्यावर शिक्षण तज्ज्ञांना प्रतिक्रिया नोंदवण्याची दिलेली मुदत वाढून मिळावी, अशी मागणी सत्यशोधक शिक्षक सभा सिंधुदुर्गच्यावतीने शालेय शिक्षण मंत्री दीपक केसरकर यांच्याकडे केली आहे. तसे निवेदनही त्यांना दिले.
या निवेदनात म्हटले आहे, ‘‘नव्या अभ्यासक्रमाचा आराखडा आणि त्याचा मसुदा संकेतस्थळावर २३ मे पासून प्रसिद्ध केला आहे. मसुद्याबाबत सर्व समाज घटक, शिक्षक, पालक, शिक्षक तज्ज्ञ व शैक्षणिक प्रशासन यांना आपले अभिप्राय नोंदविण्याची मुदत तीन जूनपर्यंत दिली आहे. परंतु, या आराखड्याची एकूण पानांची संख्या ३३० असून केवळ अकरा दिवसांत हे शक्य होणार नाही. शालेय शिक्षण विभागाची उद्दिष्टे, रचना, अध्ययन मानके, मूल्यांकन दृष्टिकोन, वेळेचे व्यवस्थापन अशा विविध अनुषंगाने अभिप्राय नोंदविणे आवश्यक आहे. परिषदेने तयार केलेला आराखडा मराठीत असून राजकीय शिक्षण धोरण २०२० च्या तरतुदीची किती सुसंगत अथवा विसंगत आहे. हे तपासण्यासाठी बराच वेळ लागणार आहे. तरी यासाठी ३१ ऑगस्ट पर्यंत मुदत देण्यात यावी.’’