सायबर गुन्ह्यांबाबत सावधानता बाळगा

सौरभ अग्रवाल ः तक्रार नोंदणीबाबत मार्गदर्शन

सकाळ वृत्तसेवा
सिंधुदुर्गनगरी, ता. २ : सध्या ऑनलाईन आर्थिक फसवणुकीच्या गुन्ह्यांमध्ये मोठ्या प्रमाणावर वाढ झाली आहे. वेगवेगळ्या फसवणुकीच्या माध्यमाद्वारे होणाऱ्या फसवणुकीस नागरीक बळी पडत आहेत, अशा सायबर गुन्ह्याबाबत सावधानता बाळगण्याचे आवाहन जिल्हा पोलिस अधीक्षक सौरभ अग्रवाल यांनी केले आहे.
ऑनलाईन आर्थिक फसवणुकीस बळी पडल्यास तात्काळ नॅशनल सायबर क्राईम रिपोर्टीग पोर्टल (NCCR portal) (https://cybercrime.gov.in) वर तक्रार नोंद करावी. किंवा हेल्पलाईन क्रमांकावर कॉल करून तक्रार नोंदवावी. भारत सरकारद्वारे मोबाईल चोरी, मोबाईल हरवणे याबाबतच्या तक्रारीबाबत मोबाईल ट्रेस करुन तो मोबाईल धारकांना परत मिळवून देण्यासाठी CEIR (Central Equipment Identity Register) हे ऑनलाईन पोर्टल विकसित केले आहे. या पोर्टलद्वारे ज्या व्यक्तींचे मोबाईल गहाळ होतात किंवा चोरीस जातात त्यांनी https://www.ceir.gov.in या संकेतस्थळाद्वारे CEIR( Central Equipment Identity Register) या पोर्टलवर ऑनलाईन तक्रार नोंदवावी. तक्रार नोंदविल्यानंतर पोलिस विभागाकडून त्याबाबत तांत्रिक पद्धतीने तो मोबाईल ट्रेस केला जातो व संबंधित मोबाईल धारकांना योग्य त्या कार्यवाहीने परत केला जातो. नागरीकांचे मोबाईल गहाळ झाल्यास, हरविल्यास, चोरीस गेल्यास त्यांनी https://www.ceir.gov.in या संकेतस्थळाद्वारे CEIR या पोर्टलवर ऑनलाईन तक्रार नोंदवावी, असेही आवाहन करण्यात आले आहे.