गुणवंत विद्यार्थ्यांचा दापोलीत सत्कार
दाभोळ, ता. २ : दापोली येथील संतोषभाई मेहता फाउंडेशन आणि ब्रिलियंट अॅकॅडमी आयोजित दहावी परीक्षेत ७५ टक्के आणि त्यापेक्षा जास्त गुण मिळविणाऱ्या विद्यार्थ्यांचा सत्कार राधाकृष्ण मंदिरमध्ये करण्यात आला. या प्रसंगी दापोली व मंडणगड तालुक्यातील जवळजवळ १५० पेक्षा जास्त गुणवंत विद्यार्थी उपस्थित होते.
या निमित्ताने दहावीनंतर पुढे काय व कोणत्या करिअर संधी उपलब्ध असणार आहेत याबद्दल संतोषभाई मेहता फाउंडेशनचे अध्यक्ष सुजय मेहता यांनी मार्गदर्शन केले. स्वप्ने साकार करण्यासाठी अथक परिश्रम घेण्याची गरज असते, असा मोलाचा कानमंत्रही त्यांनी दिला तसेच ब्रिलियंट अॅकॅडमीचे डॉ. अजित भोसले यांनी मुलांना नीट व जेईई या परीक्षेबद्दल माहिती दिली.
विद्यार्थ्यांचे कौतुक व प्रोत्साहन देण्यासाठी त्यांना एक छोटीशी भेटवस्तू व अल्पोपाहार देण्यात आला. कार्यक्रमाला ज्ञानदीप संस्थेच्या अध्यक्षा सरोज मेहता, मेहता फाउंडेशनचे चेअरमन सुजय मेहता, मुख्याध्यापक मधुकर मोरे, सरोज मेहता इंटरनॅशनल स्कूलच्या मुख्याध्यापिका रीतू मेहता, मेहता इंग्लिश स्कूलच्या मुख्याध्यापिका चंदाली पारकर, ज्ञानदीप प्राथमिक विभागाचे मुख्याध्यापक महेश शिंदे आदी उपस्थित होते.