मास्टरमाईंड अनीचे सीमकार्डही दुसऱ्याच्या नावे

आरजू टेक्सोल कंपनी फसवणूक; लोकेशन मिळविण्यात अडचणी

रत्नागिरी, ता. २ : आरजू टेक्सोल कंपनी मास्टरमाईंड अनी जाधव याने मोबाईलची सीमकार्डदेखील दुसऱ्याच्या नावावर घेतल्याचे पोलिस तपासात पुढे आले आहे. त्यामुळे त्याचे लोकेशन शोधण्यात पोलिसांच्यासमोर आव्हान बनले आहे.
मास्टरमाईंड अनी जाधव कंपनी स्थापनेपूर्वीच स्वत:ला वाचविण्यासाठी कंपनीच्या कागदोपत्री व्यवहारापासून दूर होता. एमआयडीसीमध्ये एका हॉटेलमध्ये शेफ म्हणून काम करताना गुंतवणुकीचा हा फंडा त्याने संशयितांना दिला; परंतु गुंतवणूकदारांना ज्या योजना दिल्या, परताव्याची हमी दिली ती कंपनी पूर्ण करू न शकल्याने ग्रामीण पोलिस ठाण्यात संचालकांविरुद्ध गुन्हा दाखल झाला. या गुन्ह्यामध्ये अनी जाधव याचा उल्लेख तक्रारदाराने केला आहे; परंतु कागदोपत्री अनी जाधव कंपनीवर कुठेच नाही. या प्रकरणी दोन संचालकांना पोलिसांनी अटक केली तेव्हा तपासामध्ये अनी जाधवच मास्टरमाईंड असल्याचे उघड झाले.
पोलिसांना आपले लोकेशन मिळू नये यासाठी त्याने दुसऱ्याच्या नावे अनेक मोबाईल सीमकार्ड घेतल्याचे स्पष्ट झाले आहे. त्यामुळे त्याचा शोध घेणे पोलिसांनाही अवघड होत आहे. मास्टरमाईंड असलेल्या अनी जाधव याने संचालकांऐवजी अन्य काही व्यक्तींवरही डिपॉझिटची रक्कम गोळा करण्याचे काम दिल्याचेही सांगण्यात येत आहे.
आरजू टेक्सोलने गुंतवणूकदारांना विविध आमिषे देत स्वयंरोजगाराचे गाजर दाखवत फसवणूक केल्याचे निष्पन्न झाले आहे. कंपनीच्या विरोधातील तक्रारींचा ओघ वाढत असून हा आकडा दोन कोटींच्यावर गेला आहे. संशयितांच्या पोलिस कोठडीत वाढ झाल्याने आणखी काही महत्त्‍वाची माहिती पोलिसांना मिळण्याची शक्यता आहे.