तटकरे की गीते?
दाभोळ, ता. ३ ः रायगड लोकसभा मतदारसंघातही उत्सुकता शिगेला पोहोचली दिसत आहे. राष्ट्रवादी अजित पवार गटाचे प्रदेशाध्यक्ष, खासदार सुनील तटकरे आणि शिवसेना ठाकरे गटाचे नेते, माजी केंद्रीय मंत्री अनंत गीते या दोघांमधील कोण बाजी मारणार याबाबत दिवसभर चर्चा सुरू आहे. लोकसभेच्या निकालापूर्वीच उमेदवारांच्या विजयाचे बॅनर लागले आहेत. दापोली येथील कार्यालयासमोर ‘सुनील तटकरे यांचे प्रचंड बहुमताने निवड झाल्याबद्दल अभिनंदन’ असा फलक राष्ट्रवादी काँग्रेसच्या महिला जिल्हाध्यक्षा साधना बोथरे यांनी लावला आहे. यावेळी अतिशय चुरशीची लढत झाल्याने कोणीच ठामपणे निकाल सांगू शकत नाही, असे चित्र आहे. या लोकसभा मतदारसंघाच्या निकालाकडे संपूर्ण राज्याचे लक्ष लागून राहिले आहे.