८७७७०
८७७७१

राजापुरात पावसाच्या सरी
उकाडा कायमः जैतापूरला झाड कोसळून शाळेचे नुकसान
सकाळ वृत्तसेवा
राजापूर, ता. ४ः राजापूर शहर आणि परिसरातील गावांमध्ये दुपारी पावसाच्या तुरळक सरी कोसळल्या. तालुक्याच्या पश्‍चिम भागामध्ये पावसाचा शिडकावा न होता काही काळ ढगाळ तर काही काळ कडकडीत ऊन अशी स्थिती होती. पावसाच्या शिडकाव्यामुळे उकाडा मात्र कायम आहे. दरम्यान, जैतापूर येथे आंब्याचे झाड कोसळून येथील जिल्हा परिषद शाळेचे किरकोळ नुकसान झाले आहे.
गत महिन्यामध्ये तालुक्यात सातत्याने वळवाचा पाऊस पडला. वळवाच्या पावसाचा काही भागामध्ये तडाखा बसून नुकसानही झाले आहे. काही भागातील नैसर्गिक जलस्रोत वाढून त्या त्या भागातील पाणीटंचाईला दिलासा मिळाला आहे. आज सकाळी स्वच्छ सूर्यप्रकाश आणि ऊन होते; मात्र दुपारी अचानक वातावरणामध्ये बदल होऊन ढगाळ वातावरण निर्माण झाले. दुपारी पावसाच्या तुरळक सरी कोसळल्या. अर्ध्या तासाहून अधिक काळ पाऊस पडत होता; मात्र पाऊस थांबताच हवेमध्ये पुन्हा एकदा उकाडा निर्माण झाला होता.
शहर आणि परिसरामध्ये पावसाच्या सरी कोसळल्या असल्या तरी पश्‍चिम भागातील गावांमध्ये कडाक्याचे ऊन आणि स्वच्छ सूर्यप्रकाश अशी स्थिती होती. आज सकाळी जैतापूर येथे आंबा कलमाचे मोठे झाड कोसळल्याची घटना घडली. यामध्ये येथील शाळेचे किरकोळ प्रमाणात नुकसान झाले आहे; मात्र नुकसानीचा निश्‍चित आकडा समजू शकलेला नाही.