87968

वैभववाडीत भाजप कार्यकर्त्यांची
घोषणाबाजीसह विजयी फेरी
सकाळ वृत्तसेवा
वैभववाडी, ता. ४ः रत्नागिरी-सिंधुदुर्ग लोकसभा मतदारसंघातून भाजपचे उमेदवार केंद्रीय मंत्री नारायण राणे मोठ्या मताधिक्याने विजयी झाले. या विजयाचा येथील भाजप कार्यकर्त्यांनी जोरदार जल्लोष केला. फटाक्यांची आतषबाजी आणि घोषणाबाजी करीत शहरातून विजयी फेरी काढण्यात आली.
रत्नागिरी-सिंधुदुर्ग लोकसभा मतदारसंघातून भाजपचे उमेदवार राणे हे निर्णायक आघाडी घेऊ लागल्यानंतर येथील भाजप संपर्क कार्यालयात कार्यकर्त्यांची गर्दी वाढू लागली. श्री. राणे विजयी होताच भाजप कार्यकर्त्यांनी कार्यालयाबाहेर फटाक्यांची आतषबाजी केली. ‘नारायण राणे तुम आगे बढो, हम तुम्हारे साथ है’, ‘भारतीय जनता पक्षाचा विजय असो’ अशा घोषणा देत कार्यकर्त्यांनी भाजप कार्यालय ते दत्त मंदिर अशी शहरातून विजयी फेरी काढली. यावेळी जिल्हा बँक संचालक दिलीप रावराणे, जिल्हा उपाध्यक्ष प्रमोद रावराणे, माजी सभापती अरविंद रावराणे, सुधीर नकाशे, उत्तम सुतार, बाबा कोकाटे, राजू पवार, सुनील रावराणे उपस्थित होते.