-ratchl४३.jpg ः
२४M८७९५८
चिपळूण ः शहरात सायंकाळी पावसाने लावलेली हजेरी.
---------------

चिपळुणात पावसाने दिलासा

चिपळूण, ता. ४ ः गेल्या काही दिवसांपासून प्रतीक्षा लागून असलेल्या मान्सूनने मंगळवारी आपली चाहूल दिली. दोन दिवसापांसून तालुक्यात अनेक ठिकाणी पेरणीची कामे सुरू झाली आहेत. त्यातच मान्सून दाखल झाल्याने शेतकरीवर्ग सुखावला आहे.
यावर्षी एप्रिल महिन्याच्या सुरवातीपासूनच कडकडीत ऊन आणि प्रचंड उन्हाळा जाणवत होता. त्यामुळे नागरिक अक्षरशः हैराण झाले होते. उन्हाच्या कडाक्यानंतर मे महिन्याच्या मध्यावर अवकाळी पावसाने अवघा परिसर झोडपून काढला. सलग सहा दिवस येथे वादळी वारे आणि विजांच्या कडकडाटासह जोरदार पाऊस झाला. या पावसात चिपळूण तालुक्यात घरांचे व गोठ्यांचे सुमारे दोन कोटींहून अधिक नुकसान झाले. त्यामध्ये महावितरणचे ७८ लाखांचे नुकसान झाले; मात्र या अवकाळी पावसानंतर पुन्हा कडाक्याचा उन्हाळा जाणवला. गर्मीने सारेचजण हैराण झाले होते. अशातच मंगळवारी सायंकाळी ५.३० वा. अचानक पावसाचे वातावरण तयार झाले आणि काही वेळातच पावसाला सुरवात झाली. त्यानंतर तासभर पावसाची रिपरिप सुरूच होती. या पावसामुळे व्यापारीवर्गाची तारांबळ उडाली; मात्र शेतकरीवर्ग पेरणीच्या कामांमुळे सुखावला आहे.