88188

चिपळुणातील शंकरवाडीत फुलली फुलांची बाग
जागतिक पर्यावरणदिन; वृक्ष लागवडीसाठी देणार मोफत रोपे
चिपळूण, ता. ५ः शहरातील शंकरवाडी येथे रंगबेरंगी फुलांची बाग तयार करत चिपळूण पालिका प्रशासनाने बुधवारी जागतिक पर्यावरणदिन साजरा केला. पर्यावरण संवर्धनासाठी ‌‘वेडं‌’ होऊन काम करायला हवं, असे मत मुख्याधिकारी विशाल भोसले यांनी मांडले.
मुख्याधिकारी विशाल भोसले यांच्या संकल्पनेतून शंकरवाडी येथे हा उपक्रम राबवण्यात आला. पालिकेच्या जागेमध्ये नजरेला भुरळ घालणाऱ्या फूलझाडांची लागवड करण्यात आली. कार्यक्रमाला शंकरवाडी येथील नागरिकांनाही उत्स्फूर्त प्रतिसाद दिला. कार्यक्रमाचे नियोजन प्रशासकीय अधिकारी मंगेश पेढांबकर, कार्यालयीन अधीक्षक अनंत मोरे, उद्यान विभागप्रमुख प्रसाद उर्फ बापू साडविलकर यांनी केले. सह्याद्री निसर्गमित्र संस्थेचे भाऊ काटदरे, माजी उपनगराध्यक्ष बापू काणे, उद्योजक रामशेठ रेडीज, माजी नगरसेविका आदिती देशपांडे, माजी नगरसेविका शिवानी पवार आदी उपस्थित होते. शहरातील विविध भागांमध्ये लहान मुलांना खेळण्यासाठी मैदान, उद्यान आणि फुलांच्या बागा जास्तीत जास्त प्रमाणात उपलब्ध कराव्यात, अशी मागणी नागरिकांनी केली. फुलांची बाग उपक्रम राबवल्याबद्दल शंकरवाडी नवीन वसाहत येथील ग्रामस्थांनी पालिका प्रशासनाचे आभार मानले.
शहरातील खासगी निवासी इमारती संकूल/बंगलो, खासगी मोकळ्या जागा येथे ज्या मालकांना आपल्या जागेमध्ये वृक्ष लागवड करण्याची इच्छा आहे त्यांनी पालिकेमार्फत विनामोबदला वृक्षरोपांचे वाटप केले जाणार आहे. हे वृक्ष पालिका हद्दीमध्येच लावण्याची अट आहे. वृक्ष लागवड व वृक्ष संगोपन हे मालकांनी करावयाचे आहे. या योजनेचा लाभ घेण्यास इच्छुक असणाऱ्या जमीनमालकांनी १५ जूनपर्यंत आपली मागणी नगरपालिकेचे उद्यान विभागप्रमुख प्रसाद उर्फ बापू साडविलकर यांच्याकडे कार्यालयीन वेळेत करावीत, असे आवाहन केले आहे.

चौकट
नागरिकांना तांब्या-पेल्यामधून पाणी
जागतिक पर्यावरणदिनापासून चिपळूण पालिका कार्यालायामध्ये सर्व विभागातील अधिकारी, कर्मचारी यांनी प्लास्टिक पाणीबॉटलचा वापर न करण्याचा निर्धार केला आहे तसेच येणाऱ्या नागरिकांना तांब्या-पेल्यामध्ये किंवा ग्लासमधून पाणी देण्यास सुरवात केली आहे. पर्यावरण संवर्धनासाठी तशा सूचना मुख्याधिकारी विशाल भोसले यांनी दिल्या होत्या.