तरुणाची ११ लाखांची फसवणूक

कर्ज मिळवून देण्याचे अमिष; भामट्यावर गुन्हा

सकाळ वृत्तसेवा

रत्नागिरी ः शहरानजीकच्या कुवारबाव येथील मिठाई व्यावसायिक सोशल मीडियावरील लोन मिळण्याच्या जाहिरातीला बळी पडला. यामध्ये त्यांची ११ लाख ६० हजार ६७४ रुपयांची फसवणूक झाली. शहर पोलिस ठाण्यात संशयिताविरुद्ध गुन्हा दाखल करण्यात आला आहे. ही घटना १५ मार्च ते १७ एप्रिल २०२४ या कालावधीत कुवारबाव परिसरात घडली.

याबाबत पोलिसांनी दिलेली माहिती, राणाराम काळुराम रायका (३८, रा. कुवारबाव, रत्नागिरी) यांनी मोबाईलवरील इन्स्टाग्राम अ‍ॅपवर लोन मिळेल, अशी जाहिरात पाहिली. त्यावरील मोबाईलवर फोन केल्यावर त्यांना अज्ञाताने लोन मिळेल असे आमिष दाखवत त्यांचा विश्वास संपादन केला. त्यानंतर संशयिताने आपला क्युआर कोड देऊन प्रथम ५ हजार नंतर इन्शुरन्ससाठी ३८ हजार रुपये ऑनलाईन घेतले. त्यानंतर फिर्यादी राणाराम रायका यांनी वेळोवेळी ऑनलाईन ६ लाख २३ हजार ८८४ आणि आपल्या दोन मित्रांच्या बँकखाते आणि ऑनलाईनद्वारे संशयिताला ३ लाख ६३ हजार २९० असे एकूण ११ लाख ६० हजार ६७४ रुपये पाठवले. एवढे पैसे देऊनही कर्ज न मिळाल्याने आपली फसवणूक झाल्याचे लक्षात येताच राणाराम रायका यांनी बुधवारी (ता. ५) शहर पोलिस ठाण्यात तक्रार दिली. तक्रारीवरून पोलिसांनी संशयिताविरुद्ध गुन्हा दाखल केला आहे. अधिक तपास शहर पोलिस अंमलदार करत आहेत.
---------