88894

ठाकरे गटाच्या पाठपुराव्याने
बांद्यात रस्त्याचे काम सुरू

सकाळ वृत्तसेवा
बांदा, ता. ८ ः येथील जलजीवन योजनेचे काम करण्यासाठी खोदाई करण्यात आली होती. त्यामुळे नाबर शाळा ते खेमराज हायस्कूल या रस्त्याची बाजूपट्टी कमकुवत होऊन रस्ता खड्डेमय झाला होता. याबाबत ग्रामपंचायत सदस्य तथा ठाकरे शिवसेनेचे बांदा शहरप्रमुख साईप्रसाद काणेकर यांनी संबंधित ठेकेदाराकडे पाठपुरावा करत शाळा सुरू होण्यापूर्वी काँक्रिट करण्याची मागणी लावून धरली होती. अखेर आजपासून या रस्त्यावरील बाजूपट्टीचे काँक्रिटीकरण व खड्डे बुजविण्याच्या कामाला सुरुवात करण्यात आली आहे.
बांद्यात जलजीवन योजनेच्या कामासाठी रस्त्याच्या बाजूला खोदाई करण्यात आली होती; मात्र काम झाल्यानंतर बाजूपट्टी मजबुतीकरण तसेच रस्त्यावर पडलेले खड्डे बुजविण्यात दिरंगाई करण्यात येत होती. याबाबत काणेकर यांनी संबंधित ठेकेदाराला हे काम पूर्ण केल्याशिवाय इतर काम करू देणार नसल्याचा इशारा दिला होता. अखेर हे काम आजपासून सुरू करण्यात आल्याची माहिती काणेकर यांनी दिली. पावसाळ्यापूर्वी हे काम सुरू करण्यात आल्याने विद्यार्थी, पालक तसेच स्थानिकांतून समाधान व्यक्त होत आहे.