88921

वाफोलीत कॅन्टरची डंपर चेसला धडक

एक जखमी ः दोन्ही वाहनांचे मोठे नुकसान

सकाळ वृत्तसेवा
बांदा, ता. ८ ः बांदा-दाणोली मार्गावर वाफोली डोंगरीकर हॉटेल जवळ कॅन्टर व डंपर (चेस) यांच्यात समोरासमोर धडक होऊन अपघात झाला. यामध्ये मालवाहक कॅन्टरचालक किरकोळ जखमी झाला. त्याच्यावर बांदा प्राथमिक उपकेद्रांत उपचार करून घरी पाठविण्यात आल्याचे वैद्यकीय अधिकारी डॉ. गजानन सारंग यांनी सांगितले. अपघातात दोन्ही वाहनांचे मोठे नुकसान झाले. हा अपघात आज पहाटे झाला. याबाबत सायंकाळी उशिरा बांदा पोलिसांत नोंद करण्याची प्रक्रिया सुरू होती.
बांदा-दाणोली मार्गावर दोन्ही बाजूस झाडे-झुडपे वाढलेली आहेत. वळणावर समोरून येणारे वाहन चालकाला दिसत नाही. सध्या मुसळधार पाऊस सुरू आहे. हा अपघात पूर्णत: बांधकाम विभागाच्या बेजबाबदारपणामुळे घडला असल्याचा आरोप विलवडे सरपंच प्रकाश दळवी यांनी केला आहे.
या मार्गावर अपघाताचे सत्र सुरूच आहे. काही ठिकाणी रस्ता अरुंद व वळणावळणाचा आहे. दाणोली, सातोळी-बाळवाट, सरमळे, विलवडे, वाफोली, बांदा ही गावे येतात. कोल्हापूर, पुणे, बेळगाव, गोव्यात जाणारे पर्यटक याच मार्गाचा वापर करतात. या मार्गावर उतार व वळणावर रस्त्याचा अंदाज न आल्याने बरेच अपघात झाले आहेत. या मार्गावर दिशादर्शक व वेग मर्यादा फलक लावणे गरजेचे आहे. काही ठिकाणी रस्ता अरुंद व वळणावळणांचा आहे. संबंधित विभागाने रस्त्याचा सर्व्हे करणे गरजेचे आहे. यापुढे जीवितहानी, नुकसान झाल्यास संबधित विभाग जबाबदार राहील. संबंधित विभागाने गणेश चतुर्थीपूर्वी दखल न घेतल्यास माजी पंचायत समिती सदस्य संदीप गावडे यांच्या नेतृत्वाखाली सावंतवाडी बांधकाम विभाग कार्यालयात धडक देणार, असा इशाराही सरपंच दळवी यांनी दिला आहे.