कणकवली महाविद्यालयामध्ये
व्यावसायिक अभ्यासक्रम सुरू

सकाळ वृत्तसेवा
कुडाळ, ता. १० ः कणकवली कॉलेज, कणकवली येथे टूरिझम अॅंड हॉस्पिटॅलिटी मॅनेजमेंट, या व्यावसायिक अभ्यासक्रमासाठी अकरावीचा प्रवेश सुरू झाला आहे. हॉटेल मॅनेजमेंट, टूरिझम मॅनेजमेंट, कॅटरिंग मॅनेजमेंट, इव्हेंट मॅनेजमेंट, ट्रान्सपोर्ट मॅनेजमेंट, फूड सर्व्हिस मॅनेजमेंट, ट्रॅव्हल एजन्सी मॅनेजमेंट यासारख्या उपयुक्त विषयांच्या व्यवस्थापनाचा अभ्यास यामध्ये समाविष्ट आहे.
बारावीनंतर या विषयांमध्ये विशेषतः पदविका किंवा पदवी घेतल्यास नोकरीची संधी उपलब्ध होत असते. हे कोर्स पूर्ण करून नोकरी तसेच स्वयंरोजगार मिळविण्यासाठी अर्धवेळ नोकरी करणाऱ्या विद्यार्थी-विद्यार्थिनींना देखील अकरावीमध्ये प्रवेश घेता येईल. हा अभ्यासक्रम शासनमान्य व पूर्ण अनुदानित स्वरुपाचा असल्याने अकरावीचा प्रवेश मोफत असणार आहे. सिंधुदुर्ग हा देशातील पहिला पर्यटन जिल्हा असल्यामुळे येथे रोजगाराच्या अनेक संधी उपलब्ध होणार आहे. येथील मुलांनी योग्य शिक्षण घेऊन या संधीचा लाभ घेणे आवश्यक आहे. दहावीमधील गुणांची टक्केवारी बारावीमध्ये मोठ्या प्रमाणात वाढविण्यासाठी हा कोर्स उपयुक्त आहे. अधिक माहितीसाठी दहावी उत्तीर्ण झालेल्या विद्यार्थ्यांनी कणकवली कॉलेजमध्ये श्री. कोरगावकर, श्री. भिसे यांच्याशी संपर्क साधावा, असे आवाहन महाविद्यालय प्रशासनाने केले आहे.