89229

मृगाच्या पालखीचा सोहळा
बांदेश्वर मंदिरात उत्साहात

सकाळ वृत्तसेवा
बांदा, ता. १० ः येथील प्रसिद्ध जागृत स्वयंभू श्री देव बांदेश्वराचा मृगाच्या पालखीचा सोहळा नुकताच मोठ्या उत्साहात व भक्तिमय वातावरणात झाला. बांदेश्वर भक्तांच्या गर्दीत वाजतगाजत ही पालखी प्रदक्षिणा पार पडली. या पालखीला वरुण राजानेही हजेरी लावली.
दरवर्षी श्री बांदेश्वराच्या जत्रोत्सवापासून या पालखी सोहळ्याला प्रारंभ होतो. त्यानंतर दर सोमवारी मंदिराभोवती ही सवाद्य पालखी प्रदक्षिणा होते. यावेळी मंगलमय वातावरणात भाविक अभंग गायन करतात. त्यानंतर पालखीचे मंदिरात आगमन होऊन आरती व शिवनामाचा गजर केला जातो. हा सोहळा मृग नक्षत्रापर्यंत म्हणजेच मिरगापर्यंत दर सोमवारी सुरू असतो. मिरगाच्या पालखीने या सोहळ्याची सांगता होते. शुक्रवारी ही मिरगाची पालखी झाली. दरवर्षीप्रमाणे मिरगानिमित्त मंदिरात श्रींची महापूजा आयोजित केली होती. नीलेश महाजन यांनी सपत्नीक पूजन केले. रात्री ९ वाजता पालखी सोहळा प्रारंभ झाला. मोठ्या भक्तिमय वातावरणात ही पालखी प्रदक्षिणा पूर्ण झाली. मंदिरात पालखीचे आगमन होताच भजन व महाआरती करण्यात आली. ‘जय बांदेश्वर जय बांदेश्वर गजर गर्जत, पालखी चाले जत्रेपासून मिरगापर्यंत’, ‘शिव शिव शिव शिव सांब सदाशिव, हर हर हर हर सांब सदाशिव’, अशा विविध गजरात भाविक दंग झाले. आरतीनंतर मानकरी सगुण सावंत यांनी सर्वांच्या कल्याणासाठी साकडे घातले. त्यानंतर तीर्थप्रसाद वाटण्यात आला. मिरगाची पालखी झाल्यानंतर सोमवारपासून दर सोमवारी मंदिरात रात्री ८ ते ९ या वेळेत भजनसेवेला आरंभ झाला.