कृषिदिनानिमित्त
करबुडेत वृक्षदिंडी
रत्नागिरी : जिल्हा परिषद कृषी विभाग, पंचायत समिती, करबुडे ग्रामपंचायत आणि माध्यमिक विद्यालय करबुडे यांच्यावतीने आयोजित कृषिदिन कार्यक्रमात मंदिर परिसरात वृक्षारोपण करण्यात आले. त्यानंतर मंदिर ते ग्रामपंचायतदरम्यान वृक्षदिंडीचे आयोजन केले होते. या वेळी राष्ट्रीय हरितसेनेच्या विद्यार्थ्यांनी उत्स्फूर्तपणे सहभाग घेतला. वृक्षदिंडीचे सर्व नियोजन शिक्षक गजमल बहिरम यांनी केले. या कार्यक्रमाला मुख्य कार्यकारी अधिकारी कीर्तीकिरण पुजार (भाप्रसे), अति. मुख्य कार्यकारी अधिकारी परिक्षित यादव, कृषी विकास अधिकारी, सरपंच संस्कृती पाचकुडे, सर्व ग्रामपंचायत सदस्य,  लाजुळ विद्यालयाचे राष्ट्रीय हरितसेनेचे सर्व विद्यार्थी, मार्गदर्शक शिक्षक गजमल बहिरम, रघुनाथ पाचकुडे आदी उपस्थित होते.
---------------
94218

बाबासाहेब कांबळे यांना
साहित्यगौरव पुरस्कार
खेडः तालुक्यातील तळे महाविद्यालयाचे प्राचार्य बाबासाहेब कांबळे यांना राज्यस्तरीय साहित्यगौरव पुरस्काराने सन्मानित करण्यात आले. तेजस फाउंडेशन नाशिक या संस्थेच्यावतीने भारतरत्न मौलाना अबुल कलाम आझाद सभागृहामध्ये छत्रपती संभाजीनगर येथे निर्माता, दिग्दर्शक नितीन देशमुख, आशिष सातपुते, अभिनेत्री मानसी राणे, मेघा डोळस निर्माता, गीतकार गायिका कडूबाई खरात या मान्यवरांच्या हस्ते कांबळे यांना गौरवपत्र, मानपत्र, गौरवचिन्ह, शाल, पुष्पगुच्छ देऊन त्यांचा गौरव करण्यात आला. प्रा. कांबळे यांचे सच्चा समाजसेवक बहुजनांचा सखा, प्रातिनिधिक दोन कवितासंग्रह, अनेक वैचारिक, सामाजिक, शैक्षणिक लेख प्रकाशित झाले आहेत तसेच मी बिघडलो कथासंग्रह, सांज कवितासंग्रह प्रकाशनाच्या मार्गावर आहेत. त्यांच्या कार्याची दखल घेऊन हा राज्यस्तरीय साहित्यगौरव पुरस्कार त्यांना देण्यात आला आहे.

--
94219

खेड युवाशक्तीतर्फे
वारकऱ्यांना कीट
खेड ः कोकण खेड युवाशक्ती सामाजिक संस्था पुणे महाराष्ट्र राज्य यांच्यातर्फे दौंड तालुका, पानशेत वरसगाव धरणग्रस्त वारकरी दिंडी क्र. ५० या दिंडीमधील सर्व वारकऱ्यांना खाऊ व प्रथमोपचार कीट वाटप करण्यात आले. आषाढीवारीनिमित्त जगद्गुरू संत श्रेष्ठ तुकाराम महाराज आणि संत श्रेष्ठ ज्ञानेश्वर महाराज यांच्या पालखी सोहळ्यात सहभागी झालेला वैष्णवांचा मेळा टाळमृदुंगाच्या गजरात आणि ज्ञानोबा तुकारामचा जयघोष करत पिंपरी-चिंचवड आणि पुणे शहरात दाखल झाले. या वारी सोहळ्याच्यानिमित्ताने वारकऱ्यांसाठी हा उपक्रम राबवण्यात आला. कोकण खेड युवाशक्ती सामाजिक संस्था पुणेचे अध्यक्ष संदीप साळुंखे (खेड) यांच्या व युवाशक्तीच्या सर्व सभासदांच्या हस्ते म्हाळसाकांत कॉलेज, मेन गेट, आकुर्डी पुणे येथे खाऊ प्रथमोपचार कीटचे वाटप करण्यात आले.