94230

जिद्द, कठोर परिश्रम अंगीकारले तर यश निश्चित
नमिता कीर ; कर्तृत्ववान महिलांचा सन्मान कार्यक्रम
सकाळ वृत्तसेवा
रत्नागिरी, ता. २ः त्या तिघींचा जीवनप्रवास थक्क करणारा आहे. कसे जगावे हा वस्तुपाठ त्यांनी घालून दिला आहे तो आपण शिकला पाहिजे. त्यांची जिद्द, कठोर परिश्रम आपण अंगीकारले पाहिजेत आणि त्याप्रमाणे स्वतःला घडवण्याचा प्रयत्न केला पाहिजे, असे प्रतिपादन कोकण मराठी साहित्य परिषदेच्या केंद्रीय अध्यक्षा नमिता कीर यांनी केले.
कोकण मराठी साहित्य परिषदेच्या ठाणे जिल्हा महिला समिती आणि शारदा एज्युकेशन ट्रस्ट यांच्यावतीने आयोजित ''ती.... चा सन्मान या कार्यक्रमात त्या बोलत होत्या. या कार्यक्रमात दक्षिण आफ्रिकेतील किलोमांजारो हे जगातले पाचव्या क्रमांकाचे शिखर काबीज करणाऱ्या पहिल्या महिला मान मिळवणाऱ्या अमृता भालेराव, ठाण्याच्या उपायुक्त आणि कवयित्री व गायिका रूपाली अंबुरे आणि अंध बँक कर्मचारी व अंध व्यक्तींसाठी भरघोस कार्य करणाऱ्या अनुजा संखे या महिलांचा सन्मान करण्यात आला. त्याचप्रमाणे त्यांनी आपले प्रेरणादायी अनुभव व त्यांचा कार्यप्रवास प्रेक्षकांसमोर उलगडून दाखवला. कार्यक्रमाच्या सुरवातीला ठाणे जिल्हाध्यक्ष बाळ कांदळकर यांनी प्रास्तविक केले तसेच प्रा. हर्षदा लिखिते यांनी मनोगतात उपक्रमाची रूपरेषा सांगितली.
प्रा. मनीषा राजपूत आणि संध्या लगड यांनी मान्यवरांचा परिचय करून दिला. ठाण्याच्या उपायुक्त रूपाली अंबुरे यांनी पुस्तकाचे वाचनाने आपण कसे घडलो, आजोबांनी आपल्याला वाचनाची सवय कशी लावली, अमेरिकेला एम. एस करण्यासाठी जायची संधी मिळूनही एमपीएससी होऊन पोलिसदलात सेवा करण्याला दिलेले प्राधान्य आणि गुन्ह्यांचा तपास हाताळताना आलेले अनुभव या वेळी सांगितले.