दोडामार्गमध्ये अल्पसंख्याकांना
घरकुलांचा लाभ द्या ः लोबो

सकाळ वृत्तसेवा
दोडामार्ग, ता. २ ः तालुक्यात अल्पसंख्याक समाजातील लोकांची जेवढी मातीची घरे आहेत, त्यांचे फेर सर्वेक्षण करून त्यांना घरकुलांचा लाभ द्यावा, अशी मागणी ठाकरे शिवसेनेच्या महिला विभाग प्रमुख जेनिफर लोबो यांनी केली आहे. मुख्य कार्यकारी अधिकाऱ्यांना तसे निवेदन देण्यात आले.
दिलेल्या निवेदनात म्हटले की, दोडामार्ग तालुक्यात बऱ्याच ठिकाणी अल्पसंख्याक समाजाचे लोक आहेत. आमच्या सर्व्हे व माहितीनुसार बरीच कुटुंब आजही मातीच्या घरात राहतात. शासनाने पक्क्या घराची योजना जाहीर केली आहे. मातीच्या घरांचे सर्वेक्षण करून ती पक्की करावी, असा शासनाचा आदेश आहे. सद्य:स्थितीतील मातीची घरे धोकादायक अवस्थेत आहेत. त्यांचे अजून सर्वेक्षण झालेले नाही. तरी तालुक्यातील ग्रामपंचायतींना तत्काळ आदेश द्यावेत की, अल्पसंख्याक समाजाच्या घरांचे फेर सर्वेक्षण करून ज्यांची मातीची घरे आहेत, त्यांच्या पक्क्या घरासाठी प्रस्ताव सादर करावेत. अन्यथा सर्व अल्पसंख्याक समाजाला घेऊन आंदोलनाचा मार्ग अवलंबू, असा इशारा लोबो यांनी निवेदनाद्वारे दिला आहे. याबाबतचे निवेदन त्यांनी उपमुख्य कार्यकारी अधिकारी यांच्याकडे दिले आहे.
94331