देवगड आमदार कार्यालयात
‘लाडकी बहीण’साठी कक्ष

सकाळ वृत्तसेवा
देवगड, ता. २ ः ‘मुख्यमंत्री-माझी लाडकी बहीण’ या नव्या योजनेच्या अनुषंगाने देवगड जामसंडे शहरातील संभाव्य लाभार्थी महिलांच्या सोयीसाठी येथील आमदार संपर्क कार्यालयात मदत कक्ष स्थापन करण्यात आला आहे. तसेच येथील तहसीलदार कार्यालयातही आवश्यक सहाय करण्यासाठी आपले कार्यकर्ते असतील, अशी ग्वाही भाजप पदाधिकाऱ्यांनी येथे पत्रकार परिषदेत दिली.
येथील आमदार संपर्क कार्यालयात घेतलेल्या पत्रकार परिषदेत ही माहिती देण्यात आली. यावेळी भाजप नगरसेवक गटनेते शरद ठुकरूल, देवगड जामसंडे नगरपंचायतीच्या माजी नगराध्यक्षा प्रियांका साळसकर, नगरसेविका प्रणाली माने, तन्वी चांदोस्कर, माजी नगरसेविका प्राजक्ता घाडी, तन्वी शिंदे, युवामोर्चा तालुकाध्यक्ष योगेश पाटकर, शहराध्यक्ष दयानंद पाटील आदी उपस्थित होते. यावेळी योजनेच्या कागदपत्रांसाठी संभाव्य लाभार्थी महिलांना आवश्यक मदत होण्यासाठी आमदार संपर्क कार्यालयात मदत कक्ष सुरू केला आहे. हा कक्ष सकाळी १० ते दुपारी १.३० या वेळेत कार्यरत राहील. योजनेच्या अनुषंगाने असलेले दाखले, कागदपत्रे, अर्ज या अनुषंगाने या कक्षात महिलांना सहकार्य करण्यात येईल. तसेच तहसीलदार कार्यालयातही संबधित दाखले वेळेत मिळावेत यासाठी कार्यकर्ते सहकार्य करतील, असे यावेळी सांगण्यात आले.
94525