सावंतवाडी क्र. २ शाळेचा दबदबा

शिष्यवृत्ती परीक्षेत यश; आठ विद्यार्थी शिष्यवृत्तीधारक

सकाळ वृत्तसेवा
सावंतवाडी, ता. ४ ः ‘पी.एम. श्री’ जिल्हा परिषद प्राथमिक शाळा सावंतवाडी क्रमांक २ येथे पाचवी शिष्यवृत्ती परीक्षेत प्रविष्ठ झालेल्या १७ पैकी ८ विद्यार्थ्यांनी घवघवीत यश प्राप्त करीत शिष्यवृत्ती प्राप्त केली. जिल्ह्यात एकाचवेळी आठ विद्यार्थी शिष्यवृत्तीधारक होण्याचा बहुमान शाळेने मिळविला आहे. या यशाने शाळेने जिल्ह्यात आपला शैक्षणिक दबदबा निर्माण केला आहे.
शिष्यवृत्ती परीक्षेत सोहम गावडे जिल्ह्यात तिसरा व जवाहर नवोदय विद्यालयासाठी सावंतवाडी शहरात प्रथम आला. तसेच जिज्ञासा देसाई (तेरावी), योगी लेले (सोळावा), अवनी बावकर (१९ वी), सानवी सावंत (२४ वी), उत्कर्ष आदारी (२६ वा), शौर्या गावडे (४३ वी), शमिका सावळ (४६ वी) या विद्यार्थ्यांनी जिल्ह्याच्या गुणवत्ता यादीत यश मिळवून सलग दुसऱ्या वर्षी शाळेच्या शिरपेचात मानाचा तुरा रोवला. या विद्यार्थ्यांनी गणित प्राविण्य परीक्षा, भालचंद्र महाराज शिष्यवृत्ती परीक्षा आदी स्पर्धा परीक्षेतही यश प्राप्त केले.
या सर्व विद्यार्थ्यांना मुख्याध्यापिका भक्ती फाले यांचे बहुमूल्य मार्गदर्शन मिळाले. यासाठी माजी मुख्याध्यापिका चैताली गवस, शाळेतील शिक्षिका श्रीमती ठाकूर, श्रीमती ढवळ, श्री. पाटील, श्री. सावंत, श्रीमती जाधव, श्रीमती सावंत, श्रीमती शिरसाट यांची साथ मिळाली. या यशासाठी सावंतवाडी पंचायत समिती गटशिक्षणाधिकारी कल्पना बोडके, सावंतवाडी केंद्रप्रमुख श्री. ठाकूर, गटसमन्वयक श्री. पावसकर, माजी केंद्रप्रमुख म. ल. देसाई, शाळा व्यवस्थापन समिती अध्यक्ष अजित सावंत, शिक्षणप्रेमी नंदकुमार गावडे आदींनी विद्यार्थ्यांचे कौतुक केले.