विद्युत दाब वाढल्याने उपकरणे खाक

खेरवते येथील प्रकार ; महावितरणकडे भरपाईची मागणी
सकाळ वृत्तसेवा
लांजा, ता. ५ ः अचानक वाढलेल्या विद्युत दाबामुळे खेरवसे जाधववाडी येथील अनेक ग्रामस्थांच्या घरातील पंखे, टीव्ही, फ्रिज यासारखी विद्युत उपकरणे जळून खाक झाली. यामध्ये लाखो रुपयांचे नुकसान झाल्याची घटना गुरूवारी मध्यरात्री २ च्या सुमारास घडली. महावितरण कंपनीने याचे पंचनामे करून भरपाई द्यावी, अशी मागणी होत आहे.
तालुक्यात गेल्या काही दिवसांपासून विजेचा खेळखंडोबा सुरू आहे. काही ठिकाणी सातत्याने वीजपुरवठा खंडित होण्याचे प्रकार सुरूच आहेत. लांजा शहरातदेखील हा प्रकार सुरू आहे. यातच खेरवसे जाधववाडी येथे काल रात्री दोनच्या सुमारास अचानकपणे विद्युत दाब वाढला. यामुळे दाबामुळे येथील अनेक ग्रामस्थांच्या घरातील टीव्ही, फ्रिज, पंखे, ट्यूबलाइट आदी विद्युत उपकरणे जळाली. तर काही घरातील वीज उपकरणे नादुरुस्त झाली आहेत. त्यामुळे या ग्रामस्थांचे लाखो रुपयांचे नुकसान झाले आहे.
विद्युत उपकरणे जळून नुकसान झालेल्यांमध्ये प्रवीण जाधव, विजय जाधव, सदानंद जाधव, मनोहर सावंत, राजू सावंत, रामचंद्र मेस्त्री, मंगला लोटणकर, राजेंद्र मेस्त्री, सुरेंद्र ब्रीद ,रामदास सावंत, परशुराम जाधव ,संतोष लोटणकर, रवींद्र केशव लोटणकर यांसह अशा अनेक ग्रामस्थांचे यामध्ये मोठ्या प्रमाणात नुकसान झाले आहे. महावितरण कंपनीच्या अधिकाऱ्यांनी या ठिकाणी भेट देऊन नुकसान झालेल्या ग्रामस्थांच्या उपकरणाबाबत पंचनामे करावेत आणि नुकसान भरपाई द्यावी, अशी मागणी खेरवसे जाधववाडी येथील ग्रामस्थांच्यावतीने करण्यात आली आहे.