‘लांजा-दाभोळे’वरील चिरे वाहतूक बंद

राष्ट्रवादीच्या आंदोलनाला यश ; अवजड वाहनांमुळे रस्त्याची दुरवस्था

सकाळ वृत्तसेवा
लांजा, ता. ५ ः प्रशासनाकडून लांजा- दाभोळे मार्गावर अवजड वाहनांद्वारे केली जाणारी चिरे वाहतूक ही काल मध्यरात्रीपासून बंद करण्यात आली. त्यामुळे राष्ट्रवादीच्या बाबा धावणे यांच्या आंदोलनाला यश आले आहे.
लांजा तालुक्यात सापुचेतळे परिसरात भरपावसाळ्यात चिरेखाणी सुरू आहेत. याच चिरेखाणींतून मोठ्या प्रमाणात १६ टायर ट्रक या अवजड वाहनांद्वारे चिरे वाहतूक केली जात होती. या वाहतुकीमुळे लांजा-दाभोळे मार्गावर मोठ्या प्रमाणात खड्डे पडले आहेत. या खड्ड्यांमुळे अपघाताचे प्रमाणदेखील वाढीस लागले होते तसेच लांजा-दाभोळे रस्त्याचा विचार करता एवढी अवजड वाहतूक या रस्त्यावरून केली जाणे शक्य नसताना देखील ही वाहतूक सुरू असल्याने या रस्त्यावर खड्ड्यांचे साम्राज्य पसरले आहे. यामुळे वाहनचालक आणि पादचारी यांची गैरसोय होत होती. हा प्रकार बिनबोभाटपणे सुरू होता; मात्र तरीही आरटीओकडून त्याकडे दुर्लक्ष केले जात आहे.
या पार्श्वभूमीवर लांजा तालुका राष्ट्रवादी काँग्रेसचे (शरद पवार गट) युवक तालुकाध्यक्ष चंद्रशेखर उर्फ बाबा धावणे आणि सोशल मीडिया फ्रंटचे जिल्हाध्यक्ष दाजी गडहिरे यांनी याबाबतचे निवेदन निवासी नायब तहसीलदार यांना सादर केले होते. लांजा-दाभोळे मार्गावरून अवजड वाहनातून सुरू असलेली चिरा वाहतूक ही तत्काळ बंद करण्यात यावी, अशी मागणी केली होती. काल ४ जुलैला मध्यरात्रीपासून ही वाहतूक पूर्णपणे बंद करण्यात यावी, अशी मागणी करण्यात आली होती. या आंदोलनाची दखल घेत प्रशासनाकडून गुरूवारी ४ जुलैला मध्यरात्रीपासून या लांजा-दाभोळे मार्गावरील अवजड वाहनातून केली जाणारी चिरा वाहतूक ही पूर्णपणे बंद करण्यात आल्याचे बाबा धावणे यांनी सांगितले. यामुळे राष्ट्रवादी काँग्रेसच्या पदाधिकाऱ्यांच्या आंदोलनाला यश आले असल्याचे यावरून स्पष्ट झाले