९५३४६
पान १

वाढाव्यात
९५३५१

गोवंश हत्येविरोधात रास्ता रोको
सकल हिंदू समाज आक्रमक ः पोलिस अधीक्षक कार्यालयावर मोर्चा
सकाळ वृत्तसेवा
रत्नागिरी, ता. ७ : एमआयडीसी परिसरात झालेल्या गोवंश हत्येविरोधात सकल हिंदू समाज आक्रमक झाला. येथे रविवारी सकाळी मारुती मंदिरपासून पोलिस अधीक्षक कार्यालयापर्यंत धडक मोर्चा काढून निषेध नोंदवला. या प्रकरणी पोलिसांनी अटक केलेल्या संशयित आरोपीला हिंदू समाजाच्या मागणीनंतर तत्काळ न्यायालयात हजर केल्यानंतर दोन तासांनी मुख्य मार्गावरील रास्ता रोको मागे घेतला. आपल्या मागणीवर शेवटपर्यंत ठाम राहिल्याने व माजी खासदार नीलेश राणे यांच्या भक्कम पाठबळावर अखेर हिंदू समाजाच्या आंदोलनाला यश आले.
जाब विचारू मोर्चाला मारुती मंदिर येथून सुरुवात झाली. दीड हजारांहून अधिक हिंदू लोक सहभागी झाले. सकल हिंदू समाजाने आंदोलनाची हाक दिली असल्याने हिंदुंनी एकी दाखवत भर पावसात आंदोलन केले. आंदोलनात महिलांचा सहभाग लक्षणीय होता. गो हत्या को बंद करेंगे, ये संकल्प हमारा है, गो सेवा ही गोपाळ सेवा, जय श्रीराम, जयजय श्रीराम, हर हर महादेव, जय शिवाजी, संभाजी महाराजांचा विजय असो अशा घोषणांनी आसमंत दुमदुमला. हा मोर्चा जेल रोडवरून पोलिस अधीक्षक कार्यालयाकडे निघाला. बॅरिकेड्‌स‌ लावून मोर्चेकऱ्यांना येथे पोलिस अधीक्षक कार्यालयाच्या आधीच अडवले. माजी खासदार नीलेश राणे यांनी आम्ही चर्चा करायला जाणार नाही, चर्चा इथेच सर्वांसमोर होईल, असे सांगितले. त्यानंतर पोलिस अधीक्षक धनंजय कुलकर्णी यांनी कार्यालयाबाहेर येऊन थेट मोर्चेकऱ्यांशी संवाद साधला. आंदोलनात सर्वच राजकीय पक्षांचे कार्यकर्ते सहभागी झाले होते.
नीलेश राणे म्हणाले, ‘‘ज्याने हे कृत्य केले आहे, त्याला मोका लावा. कोकणनगर येथील ती व्यक्ती आहे. त्याला तीन वेळा पकडले होते. त्याच्यावर कठोर कारवाई झाली पाहिजे. हे प्रकार चालतात ते ठिकाण उद्ध्वस्त करा. गो हत्या बंदी कायदा असतानाही रत्नागिरीत असे प्रकार घडणे दुर्दैवी आहे.’’
संशयित आरोपीला न्यायालयात नेऊन हजर करा या मागणीवर हिंदू कार्यकर्ते ठाम राहिले. चर्चा झाल्यानंतर जेल रोड नाक्यावर मुख्य मार्गावर रास्ता रोको केला. यामुळे वाहतूक कोंडी झाली. वाहतूक अन्य मार्गाने वळवली. भरपावसात आंदोलक भजने म्हणत होते, घोषणा देत होते. पोलिसांनी आरोपीला न्यायालयात हजर केल्यानंतर आंदोलन मागे घेण्यात आले आणि दीड तासाने हा मार्ग मोकळा झाला.

कोट
या प्रकरणी ग्रामीण पोलिस ठाण्यात गुन्हा दाखल आहे. आठ पथकांद्वारे तपास सुरू आहे. सीसीटीव्हीद्वारे माहिती घेतली आहे. आपल्या मागणीनुसार सक्षम अधिकारी नेमून एसआयटीद्वारे चौकशी करण्यात येईल. आम्ही कोणालाही पाठीशी घातले नाही. काल एका संशयित आरोपीला ताब्यात घेतले आहे. या प्रकरणात कठोरात कठोर कारवाई केली जाईल. तस्करी करणाऱ्यांची माहिती दिली तर तशी कारवाई केली जाईल. यात कोणी पोलिस सामील असल्यास त्याचे निलंबनच नव्हे बडतर्फ करू.
- धनंजय कुलकर्णी, पोलिस अधीक्षक