95734

अरूणा प्रकल्प कालव्याच्या भिंतीला तडे
मुसळधार पावसाचा तडाखा; कामाच्या दर्जाबाबत साशंकता व्यक्त
सकाळ वृत्तसेवा
वैभववाडी, ता. ८ ः अरूणा प्रकल्पाच्या उजव्या कालव्याच्या भिंतीला तडे गेले आहेत. त्यामुळे ही भिंत कोसळण्याची शक्यता निर्माण झाली असून कालव्याच्या कामाच्या दर्जाबाबत साशंकता व्यक्त केली जात आहे.
तालुक्यात काल (ता. ७) सर्वत्र मुसळधार पाऊस झाला. काल सकाळपासून पावसाच्या जोरदार सरी पडत होत्या. दुपारनंतर त्यामध्ये मोठी वाढ झाली. यामुळे तालुक्यातील जनजीवन विस्कळीत झाले. आता या पावसामुळे झालेल्या नुकसानीचे प्रकार पुढे येत आहेत. काल झालेल्या अतिवृष्टीचा तडाखा अरूणा प्रकल्पाच्या उजव्या कालव्याला बसला. या कालव्याला तिरवडे तर्फे खारेपाटण येथील पावलेवाडी येथे कालव्याच्या काँक्रीट भिंतीला तडे गेले आहेत. त्यामुळे ही भिंतच कोसळण्याची शक्यता निर्माण झाली आहे. याशिवाय भिंतीलगतचा भराव देखील कालव्यात कोसळला आहे. या पावसात भिंतीला तडे गेल्यामुळे कालव्याच्या कामाच्या दर्जाबाबत प्रश्नचिन्ह निर्माण झाले आहे. कोट्यावधी रूपये खर्चून बांधण्यात येत असलेल्या कालव्याच्या भिंतीना तडे जात असतील तर ते काम किती वर्ष टिकेल? असा प्रश्न उपस्थित करतानाच या कामांची चौकशी करण्यात यावी, अशी मागणी स्थानिकांकडून करण्यात येत आहे.