95767
95768

देवगडमध्ये पावसामुळे पडझड
१३ लाखांचे नुकसानः मोंडमध्ये दरड रस्त्यावर
सकाळ वृत्तसेवा
देवगड, ता. ८ : विश्रांतीनंतर सुरू झालेल्या धुवाँधार पावसाने तालुक्यात विविध भागात पडझड झाली. तालुक्यात विविध भागात मिळून सुमारे १३ लाख ८२ हजार २०० रुपयांचे नुकसान झाले. गेल्या चोवीस तासात आज सकाळपर्यंत येथे यंदाच्या हंगामातील सर्वाधिक १९८ मिलीमीटर इतका पाऊस झाला. पावसाने मोंडमध्ये दरड कोसळून दगड रस्त्यावर आले होते. शिरगांवमध्ये इमारतीच्या छप्पराचे नुकसान झाले. नुकसानीची माहिती स्थानिक यंत्रणेने घेतली.
गेल्या चोवीस तासात तालुक्याच्या किनारी भागाला वादळी वाऱ्यासह जोराच्या पावसाने चांगलेच झोडपून काढले. सततच्या पावसामुळे मोंड येथे दरड खाली येऊन रस्त्यावर मोठे दगड आले होते. धालवली भागात पुराच्या पाण्याची पातळी वाढली होती. नायब तहसीलदार श्रीकृष्ण ठाकूर यांनी या भागाची पाहणी केली. शिरगांव येथील सोसायटीच्या इमारतीच्या छपराचे नुकसान झाल्याने पाणी आतमध्ये येऊन आतील खत तसेच धान्य भिजले. जामसंडे खाकशी भागात घराची संरक्षक भिंत कोसळून तसेच पायवाट कोसळून मोठे नुकसान झाले. नुकसानीची स्थानिक यंत्रणेने पाहणी केली. रहाटेश्‍वर कालवीवाडी येथील रस्त्यावरून पुराचे पाणी वाहत असल्याने वाहतूक विस्कळीत झाली होती. वाडा परिसरात पुराचे पाणी रस्त्यावरून वाहत असल्याने वाहतूक खोळंबली. देवगड-नांदगाव रस्त्यावर जामसंडे येथे रस्त्यावर पाणी आल्याने वाहतुकीला अडथळा होत होता.
यंदाच्या हंगामातील सर्वाधिक पावसाची आज नोंद झाली. दोन दिवसांत मिळून तालुक्यात सुमारे १३ लाख ८२ हजार २०० रुपयांचे नुकसान झाले. यामध्ये शिरगांव परिसरात घरे, गोठे मिळून सुमारे ३ लाख १५ हजार ७०० रुपयांचे, दाभोळे भागात सुमारे २ लाख ९१ हजार १५० रुपयांचे, मालपेवाडी येथे घरावर झाड पडून सुमारे ३० हजाराचे, किंजवडे येथे संरक्षक भिंत कोसळून सुमारे दोन लाखांचे, जामसंडे कट्टा येथे घरावर माती कोसळून सुमारे ४० हजारांचे, तोरसोळे येथे घराचे छप्पर कोसळून सुमारे ५० हजाराचे, हिंदळे येथे पाणी घरात घुसून घरातील साहित्याचे सुमारे ३७ हजार ६५० रुपयांचे, मुणगे येथे घराचे सुमारे २ लाख २० हजारांचे तर जामसंडे येथे संरक्षक भिंत कोसळून सुमारे दोन लाखांचे नुकसान झाल्याची माहिती येथील तहसीलदार कार्यालयातील महसूल यंत्रणेने दिली.