नोकरीला लावतो या बहाण्याने दुचाकीची चोरी
फोंडाघाट येथील घटना : संगमेश्‍वर येथील तरुणाची फसवणूक
कणकवली, ता. १० : कणकवलीत नोकरीला लावतो असे सांगून संगमेश्‍वर येथील युवकाला जाधव नामक व्यक्‍तीने कुडाळ येथे आणले. तर परत जाताना त्‍या युवकाला फोंडाघाटात एकटे सोडून तसेच दुचाकी घेऊन संशयित आरोपी जाधव हा फरार झाला आहे. त्‍याच्याविरोधात दुचाकी चोरीचा गुन्हा आज नोंदविण्यात आला.
याबाबत अधिक वृत्त असे की, फिर्यादी अनिकेत संदीप नागवेकर (वय २२, रा. आंबेड, भंडारवाडी, ता. संगमेश्‍वर) हा तेथीलच एका कंपनीमध्ये सिक्‍युरिटी गार्ड म्‍हणून कामाला आहे. नागवेकर राहत असलेल्‍या घरापासून काही अंतरावर असलेल्‍या चाळीमध्ये आठ दिवसांपूर्वी जाधव ही सुमारे ६० वर्षे वयाची व्यक्‍ती भाड्याने रहायला आली. त्‍याची आणि अनिकेत नागवेकर याची ओळख झाली. यात जाधव याने तुला कणकवलीत नोकरीला लावतो असे आमिष दाखवले.
त्‍यानुसार २९ जून रोजी अनिकेत नागवेकर याने शेजारी सायली सतीश चाळके यांची दुचाकी (एमएच ०८ अेव्ही ७७७४) घेतली. या दुचाकीवरून जाधव आणि अनिकेत नागवेकर हे कणकवलीत आले. ३० जून रोजी अनिकेत नागवेकर आणि जाधव हे दोघे कणकवली आणि तेथून ओरोस येथे गेले. जाधव याने अनिकेत याला जिल्‍हा कारागृह बाहेरून दाखवले आणि ते कुडाळ येथे गेले. रात्र झाल्‍याने त्‍यांनी कुडाळ येथील लॉजवर मुक्‍काम केला. २ जुलै रोजी कुडाळ येथून जाधव आणि अनिकेत नागवेकर हे दुचाकीवरून फोंडाघाट मार्गे संगमेश्‍वरला जाण्यासाठी निघाले. सकाळी आठच्या सुमारास फोंडाघाटातील निर्जन ठिकाणी आल्‍यानंतर जाधव याने लघवीच्या बहाण्याने दुचाकी थांबवली. यात अनिकेत नागवेकर खाली उतरल्‍यानंतर जाधव हा दुचाकी घेऊन कोल्‍हापूरच्या दिशेने फरार झाला. या घटनेनंतर अनिकेत याने फोंडाघाट बसस्थानक गाठले. तेथून त्‍याने एस.टी. बसने संगमेश्‍वर पर्यंत प्रवास केला आणि तेथील पोलिसांत दुचाकी चोरीची फिर्याद दिली. मात्र ही घटना फोंडाघाट येथे घडली असल्‍याने संगमेश्‍वर पोलिस ठाण्यातून हा तपास कणकवली पोलिसांकडे वर्ग करण्यात आला. या घटनेतील दुचाकी चोरी प्रकरणी जाधव या व्यक्‍तीवर गुन्हा दाखल केला असून अधिक तपास हवालदार उत्तम वंजारे करत आहेत.