इच्छुकांची ग्रामीण भागात साखरपेरणी

तयारी निवडणुकीची; सणांवेळी हात सोडले सैल

सकाळ वृत्तसेवा
राजापूर, ता. २७ ः स्थानिक स्वराज्य संस्थांच्या निवडणुका वारंवार पुढे ढकलण्यात येत असल्यामुळे इच्छुकांची घालमेल सुरू आहे. त्यांना कार्यकर्ते आणि एकगठ्ठा मते सांभाळण्यासाठी गणेशोत्सव, दसरा आणि दिवाळी आदी सणांवेळी हात सैल करावा लागत आहे. निवडणुकीपर्यंत तरी कार्यकर्ते खुश राहू देत, असा विचार करत काही इच्छुकांनी ग्रामीण भागात साखरपेरणी सुरू केल्यामुळे अनेकजण भलतेच खुश दिसत आहेत.
गणेशोत्सवापूर्वी राज्यातील विधानसभा निवडणुका होण्याची शक्यता वर्तवली जात होती. त्यानंतर, लागलीच जिल्हा परिषद, पंचायत समिती आणि नगर पालिका अशा स्थानिक स्वराज्य संस्थांच्या निवडणुका होण्याचे अंदाज साऱ्यांचे होते. विधानसभा निवडणुका जाहीर न झाल्याने हे अंदाज फोल ठरले आहेत. लोकसभा निवडणुका संपताच विधानसभा निवडणुकीची राजकीय पक्षांसह इच्छुकांकडून जोरदार तयारी सुरू झाली आहे. त्यामध्ये कार्यकर्त्यांच्या बैठका, मेळावा, वाडीवस्तीवरील गावभेटी, लोकांशी संवाद, विविध कार्यक्रमांना उपस्थिती यांची राजकीय पक्षांसह नेतेमंडळी, पुढारी आणि इच्छुकांची रेलचेल वाढली आहे. कार्यकर्त्यांची धावपळ वाढली आहे. गणेशोत्सवानंतर विधानसभा निवडणूक जाहीर होण्याची शक्यता आहे. निवडणूक म्हटल्यानंतर राजकीय पक्ष, इच्छुक उमेदवारांची भिस्त कार्यकर्त्यांवर असते. इच्छुक उमेदवार नेहमीच कार्यकर्त्यांना सांभाळत असतात. गणेशोत्सवापाठोपाठ दसरा आणि दिवाळी सण येणार आहेत. त्यामुळे इच्छुकांनी होऊ दे खर्च; पण कार्यकर्ते राहू देत खुश, अशी भूमिका घेतली आहे.