मोटार- दुचाकी अपघातात
बावशी येथील तरूण ठार

वाघेरी फाटा येथील घटना, महिला जखमी

सकाळ वृत्तसेवा
कणकवली, ता.२७ : देवगड-निपाणी रस्त्यावरील वाघेरी फाटा येथे मोटारीने दुचाकीला धडक दिल्याने झालेल्या अपघातात दुचाकीवरील तरूण ठार झाला. संदीप गणपत तांबे (वय ४०), असे मृताचे नाव आहे. तर संदीप यांची पत्‍नी जखमी झाली. ही घटना मध्यरात्री सव्वाबाराच्या सुमारास घडली.
याबाबत बावशी शेळीचीवाडी येथील नारायण बापू मांडवकर (वय ५९) यांनी आज पोलिसांत फिर्याद दिली. बावशी शेळीचीवाडी येथील संदीप तांबे आणि त्‍यांची पत्‍नी आरती या दुचाकीने (एमएच ०७ एन ०६१५) फोंडाघाट ते बावशी येत होते. फोंडाघाट-निपाणी रस्त्यावर वाघेरी फाटा येथे त्‍यांच्या दुचाकीला अज्ञात मोटारीची धडक बसली. या अपघातात दुचाकीवरील संदीप आणि आरती रस्त्याकडेला फेकले गेले. अपघातानंतर या घटनेची माहिती आरती तांबे यांनी बावशी येथील नारायण बापू मांडवकर यांना दिली. त्‍यांनी तातडीने वाघेरी फाटा येथे धाव घेतली. त्‍यानंतर जखमींना खासगी रूग्‍णवाहिकेतून कणकवली उपजिल्‍हा रूग्‍णालयात दाखल करण्यात आले. यावेळी संदीप यांचा उपचारापूर्वीच मृत्यू झाल्याचे डॉक्‍टरांनी जाहीर केले. तर जखमी आरती यांच्यावर उपचार सुरू आहेत. या घटनेचा तपास पोलिस उपनिरीक्षक शरद देठे करत आहेत.