15342
कीड रोग व्यवस्थापनाचे
बिडवाडीत ‘कृषी’तर्फे धडे

सकाळ वृत्तसेवा
तळेरे, ता. १ : महाराष्ट्र शासन-कृषी विभागामार्फत भात पिकांवरील कीड रोग सर्वेक्षण सल्ला प्रकल्प (क्रॉपसॅप) अंतर्गत भात पीक शेतीशाळा वर्ग घेण्यात आला. ही शेतीशाळा बिडवाडी-कासारवाडी येथील शेतकरी पुंडलिक सावंत यांच्या अंगणात पार पडली.
यावेळी मोठ्या संख्येने शेतकरी उपस्थित होते. उपस्थित शेतकऱ्यांना कृषी विज्ञान केंद्र, किर्लोसचे शास्त्रज्ञ डॉ. भास्कर काजरेकर यांनी भात पिकावरील कीड व रोग तसेच सेंद्रिय शेतीविषयी मार्गदर्शन केले. प्रत्यक्ष प्रक्षेत्रावर जाऊन पीक परिसंस्था निरीक्षणे घेण्यात आली. तरंदळे कृषी सहाय्यक जान्हवी चव्हाण यांनी कृषी विभागातील विविध योजनांची माहिती दिली. यावेळी शास्त्रज्ञ डॉ. भास्कर काजरेकर, शांतिनाथ पवार, श्रीमती निरवडेकर, कृषी सहाय्यक जान्हवी चव्हाण तसेच शेतकरी, महिला उपस्थित होत्या.