विकासकामांच्या निविदा आज उघडणार

मुख्याधिकारी हर्षला राणे ः कॉंग्रेस तालुकाध्यक्षांना पत्र

सकाळ वृत्तसेवा
लांजा, ता. ३ ः लांजा तालुका कॉंग्रेसने दिलेल्या आंदोलनाच्या इशाऱ्याची दखल घेत विकासकामांच्या निविदा उद्या (ता.४) घडण्यात येतील असे लांजा नगरपंचायतीचे मुख्याधिकारी हर्षला राणे यांनी सांगितले.
लांजा नगरपंचायतीमार्फत नगरपंचायतीच्या अखत्यारीत असलेल्या विकास कामांची निविदा काढण्यात आली होती. ही निविदा २० जुलै २०२४ रोजी प्रसिद्ध करण्यात आली होती. तसेच विकासकामांची निविदा उघडण्याची अंतिम तारीख २ ऑगस्ट होती. मात्र दोन महिन्यांचा कालावधी उलटून गेला तरीही नगरपंचायतीमार्फत ही निविदा उघडली गेली नाही. याबाबत तातडीने कार्यवाही करावी अन्यथा या विरोधात २ ऑक्टोबर रोजी आंदोलन करू असा इशारा लांजा तालुका कॉंग्रेसतर्फे देण्यात आला होता. हे निवेदन कॉंग्रेस तालुकाध्यक्ष श्रीकृष्ण हेगिष्ट‌ये, शहराध्यक्ष रवींद्र राणे, तालुका उपाध्यक्ष मकरंद जोशी यांनी दिला होता. या आंदोलनाची दखल घेत लांजा नगरपंचायतीच्या मुख्याधिकारी हर्षला राणे यांनी कॉंग्रेस पदाधिकाऱ्‍यांना निवेदन दिले आहे. नगरपंचायत कार्यालयातील अभियंतांचे पद रिक्त असल्यामुळे त्यावर कार्यवाही प्रलंबित होती. ३० सप्टेंबर रोजी स्थापत्य अभियंता यतिराज जाधव यांच्याकडे अतिरिक्त कार्यभार देण्यात आला आहे. त्यांच्यामार्फत प्राप्त निविदाधारकांच्या कागदपत्रांची पडताळणी करून पात्र निविदाधारकांची वित्तीय बोलीचा लिफाफा ४ ऑक्टोबरपर्यंत उघडण्यात येईल, अशा प्रकारचे पत्र नगरपंचायतीच्या मुख्याधिकारी हर्षला राणे यांनी कॉंग्रेस तालुकाध्यक्ष श्रीकृष्ण हेगिष्टे यांना दिले आहे.