16297

डॉ. भांड दांपत्याचा
कोल्हापुरात गौरव
चिपळूण, ता. ४ ः येथील डॉ. पवन भांड यांना व्यसनमुक्तीसाठी दिलेल्या योजनेमुळे व्यसनमुक्ती दूत, तर डॉ. कल्पना भांड यांनी मधुमेहमुक्तीसाठी दिलेल्या योगदानाची दखल घेत या भांड दांपत्यांना राज्यस्तरीय मधुमेहमुक्ती दूत या राज्यस्तरीय पुरस्काराने गौरविण्यात आले. समर्थ सोशल फाउंडेशन, न्यूट्रिफील हेल्थ सामाजिक संस्था व शिवशंभू निवासी व्यसनमुक्ती केंद्राच्या वतीने कोल्हापूर येथे त्यांना पुरस्कार प्रदान करण्यात आला.
डॉ. पवन भांड हे विविध प्रकारांचे व्यसन जडलेल्या लोकांना त्यातून बाहेर पडण्यासाठी काम करत आहेत. अमली पदार्थ, तंबाखू, दारू, अफू, गांजा आदींच्या व्यसनाधीन झालेल्या लोकांना ते मार्गदर्शन करतातात. डॉ. कल्पना भांड या मधुमेहमुक्तीसाठी प्रयत्नशील राहिल्या आहेत. मधुमेहामुळे अनेक रुग्णांना विविध त्रासाला सामोरे जावे लागते. सातत्याने त्यांना अॅलोपॅथीची औषधे घ्यावीच लागतात. रुग्णांसाठी सामाजिक भावनेतून काम करणाऱ्या येथील डॉ. भांड दांपत्याला राज्यस्तरीय पुरस्कार मिळाल्याने त्यांचे सर्व स्तरातून अभिनंदन केले जात आहे.