16342

फुलपाखरू महोत्सवाचे पारपोलीत उद्‍घाटन

जिल्हाधिकाऱ्यांची उपस्थिती; पर्यटकांचा उत्स्फूर्त प्रतिसाद

सकाळ वृत्तसेवा
सावंतवाडी, ता. ४ ः सिंधूरत्न योजनेअंतर्गत वनविभागाने पारपोली गावात फुलपाखरू महोत्सवाचे दुसऱ्या वर्षी आयोजन करण्यात आले. त्याला उत्स्फूर्त प्रतिसाद लाभला. याचे उद्घाटन जिल्हाधिकारी अनिल पाटील यांच्या हस्ते आज सकाळी करण्यात आले.
यावेळी माजी आमदार राजन तेली, राजन पोकळे, शिवसेना जिल्हाप्रमुख अशोक दळवी, बबन राणे, पारपोली उपसरपंच संदेश गुरव, सरपंच लक्ष्‍मण नाईक, उप वनसंरक्षक एस. नवकिशोर रेड्डी, सहाय्यक वनसंरक्षक वैभव बोराटे, सहाय्यक वनसंरक्षक सुनील लाड, जिल्हा परिषद मुख्य कार्यकारी अधिकारी मकरंद देशमुख, आंबोली वनक्षेत्रपाल अमित कटके, वनपाल नाईकवडी तसेच पारपोली गावातील ग्रामस्थ उपस्थित होते.
महाराष्ट्र शासनाकडून फुलपाखरांचे गाव म्हणून पारपोली गावाची अधिकृत घोषणा करण्यात आल्यानंतर वनविभागाद्वारे अनेक सोयी सुविधा या ठिकाणी निर्माण करण्यात येत असून या गावात जवळपास १८० प्रकारच्या फुलपाखरांच्या प्रजाती आढळून येतात. या प्रजातीचा ऑक्टोबर ते जानेवारी हा त्यांचा जीवनकाळ असल्याने या काळात मोठ्या प्रमाणात आढळतात. यावर्षीच्या हंगामात सलग चार महिने फुलपाखरू दर्शनाची निसर्ग भ्रमंती सुरू ठेवण्यात येणार आहे. येणाऱ्या पर्यटकांच्या राहण्याची सोय गावातच करण्यात आली असून यासाठी लागणाऱ्या सुविधा वनविभागाकडून तर निवास व्यवस्था ग्रामस्थांना करून देण्यात आली आहे. जिल्हाधिकारी पाटील यांनी वनविभाग सातत्याने राबवत असलेल्या फुलपाखरू महोत्सवाचे कौतुक केले तसेच भविष्यातील असे उपक्रम राबवण्यास आपले सदैव सहकार्य राहील, असे स्पष्ट केले. उप वनसंरक्षक रेड्डी यांनी गेल्या वर्षी आयोजित करण्यात आलेल्या फुलपाखरू महोत्सवातून अनेक पर्यटक जोडले गेले आहेत. आताही असेच पर्यटक येतील, असा विश्वास रेड्डी यांनी व्यक्त केला.